Bakı. Trend:
“Gənc alimlər və maliyyə savadlılığı” müsabiqəsinin qalibləri bəlli olub.
Elmin İnkişafı Fondunun mətbuat xidmətindən Trend-ə verilən məlumata görə, bu gün qaliblərin mükafatlandırma mərasimi keçirilib.
Müsabiqənin keçirilməsində məqsəd Azərbaycanda iqtisadi və maliyyə savadlılığının artırılması, maliyyə savadlılığının ictimai dəyər kimi tanınması və insanların davranışlarında müvafiq dəyişiklik yaratmasına yönəlmiş elmi əsərlərin meydana çıxması, gənc alim və mütəxəssislər tərəfindən müsabiqə müddətində yazılmış orijinal məqalələrin və onların aprobasiyasının qiymətləndirilməsi, mükafatlandırılması və elmi fəaliyyətin stimullaşdırılmasıdır.
Birgə müsabiqə komissiyasının rəyinə əsasən, maliyyə savadlılığı sahəsində dərc olunmuş və qalib olaraq seçilmiş ən yaxşı elmi işlər 3 nominasiya üzrə diplom və pulla mükafatlandırılıb:
I yer – Vüqar Məmmədzadə və Samir Ağayev, 1500 manat
II yer – Murad Hacıyev, 1000 manat
III yer – Nurlanə Kərimova və Yaşar Dəmirov (hər biri 500 manat)
“Gənc alimlər və maliyyə savadlılığı” birgə mükafat müsabiqəsinə təqdim olunan məqalələr ölkənin iqtisad elmi sahəsində maliyyə maarifləndirilməsi istiqamətində aparılan ilk elmi işlərdir. Bu istiqamətdə elmi tədqiqat işlərinin aparılmasını stimullaşdırmaq üçün Elmin İnkişafı Fondu gələcəkdə də bənzər müsabiqə və tədbirlər keçirməyi planlaşdırır.
Müsabiqə Azərbaycan Mərkəzi Bankı, Azərbaycan Respublikasının Prezidenti yanında Elmin İnkişafı Fondu və Almaniya Beynəlxalq Əməkdaşlıq üzrə Əmanət Kassaları Fondu tərəfindən təşkil olunub.