Bakıda Dünya Kubokunda batut üzrə fərdi proqramların qalibləri mükafatlandırılıb (FОТО)

Bakı. Cani Babayeva - Trend:

Bakıda Milli Gimnastika Arenasında batut gimnastikası və tamblinq üzrə Dünya Kubokunda batut üzrə fərdi proqramların qalibləri mükafatlandırılıb.

Trend-in məlumatına görə, kişilər arasında birinci yeri Belarus gimnastı Vladislav Qonçarov (61.590 bal), ikinci yeri çinli Dun Dun (60.320 bal), üçüncü yeri isə yaponiyalı Daiki Kişi (59.365) tutub.

Qadınlar arasında isə Çin idmançısı Linqlinq Lyu qızıl (57.050 bal), Kanada təmsilçisi Rozanna Maklennan gümüş (56.245), yaponiyalı Tisato Doihata isə bürünc (55.800) medala sahib olub.

Tokio Olimpiya Oyunlarına təsnifat xarakteri daşıyan və batutçular üçün ilin ən vacib startlarından biri olan bu Dünya Kubokunda ümumilikdə 30 ölkədən 160-dan çox gimnast iştirak edir.

Turnirdə ən yüksək icra xalını toplamış gimnastlara ənənəvi “AGF Trophy” Kuboku da təqdim olunacaq.

2019 və 2020-ci illərdə Tokio Olimpiya Oyunlarına batut gimnastikası üzrə təsnifat xarakterli 6 Dünya Kuboku keçiriləcək. Paytaxtımız gələn il bu kuboklardan daha birinə də ev sahibliyi edəcək.

Xatırladaq ki, ötən il Bakıda 26 ölkənin iştirakı ilə gimnastikanın bu növü üzrə Avropa çempionatı, daha öncəki illərdə isə Dünya kubokları (2016-cı il 17 ölkə, 2017-ci il 15 ölkə) keçirilib.

FOTO - Zaur Mustafayev