...

ETSN: İdman və həvəskar balıq ovu üçün balıqovlama biletinin alınması tələb olunmur

Cəmiyyət Materials 14 May 2019 15:15
İdman və həvəskar balıq ovu insanların şəxsi ehtiyacları, istirahəti üçündür və bu məqsədlə su hövzələrində sərbəst ov edilə bilər, bunun üçün balıqovlama biletinin alınması tələb olunmur.
ETSN: İdman və həvəskar balıq ovu üçün  balıqovlama biletinin alınması tələb olunmur

Trend-i buradan izləyin

Bakı. İlhamə İsabalayeva - Trend:

İdman və həvəskar balıq ovu insanların şəxsi ehtiyacları, istirahəti üçündür və bu məqsədlə su hövzələrində sərbəst ov edilə bilər, bunun üçün balıqovlama biletinin alınması tələb olunmur.

Trend-in məlumatına görə, bunu Ekologiya və Təbii Sərvətlər Nazirliyinin (ETSN) Su Hövzələrinin Bioloji Resurslarının Artırılması və Mühafizəsi Departamentinin direktoru Mehman Axundov deyib.

Azərbaycanda balıq ovunun qanununvericiliklə tənzimləndiyini bildirən M.Axundov əlavə edib ki, qanunvericiliyə əsasən sənaye məqsədləri ilə balıq ovu ödənişlidir və bunun üçün balıqovlama biletlərinin alınması mütləqdir.

ETSN rəsmisi qeyd edib ki, balıqovlama biletlərini Ekologiya və Təbii Sərvətlər Nazirliyi verir və elektron qaydada almaq mümkündür. Balıqovlama bileti alan şəxslər hər ilin I yarısında (iyulun 10-na kimi) və ilin sonunda (növbəti ilin yanvar ayının 10-na kimi) ovladığı balıq və digər su bioresurslarının növü və çəkisi barədə nazirliyə yarımillik və illik hesabatları təqdim etməlidir.

M.Axundovun sözlərinə görə, bu il nazirlik tərəfindən 7 hüquqi və 80 fiziki şəxsə sənaye məqsədləri ilə kvotalar ayrılaraq balıqovlama biletləri verilib:

"Lakin sənaye məqsədləri ilə balıqovlama biletinin alınması o demək deyil ki, bununla ilboyu, hər yerdə və qadağan olunmuş vasitələrlə ov etmək olar. İlk növbədə, ayrılmış kvotaya, yəni göstərilmiş balıq növü və müəyyən edilmiş çəki şərtlərinə əməl edilməlidir. İkincisi, qadağan olunmuş vaxtlarda və qadağan olunmuş yerlərdə ov edlməsi qaydalara ziddir. Bu da o deməkdir ki, Nazirlər Kabinetinin müvafiq qərarlarına əsasən, su hövzələrindən asılı olaraq hər ilin aprel və may aylarının 1-dən balıqların çoxalma dövrü, yəni kürü tökmə dövrü olduğundan onların ovlanması sentyabrın 1-dək qadağan edilir".

M.Axundov xatırladıb ki, xüsusi mühafizə olunan təbiət ərazilərində, o cümlədən qoruqların, milli parkların, yasaqlıqların ərazilərində, ümumiyyətlə sənaye balıq ovuna icazə verilmir: "Ən əsası isə balıq ovunda qanunla qadağan olinmuş ov alətlərindən istifadə yolverilməzdir. Təəssüf ki, bu hallara hələ də rast gəlinir və bu da ölkədə balıq ehtiyatlarının sürətlə tükənməsinə, bəzi nadir növlərin nəslinin kəsilməsinə şərait yaradır. Bütün balıqçılara müraciət edirik, qaydalardan kənar ov edilməsinə son qoysunlar, balıq ehtiyatlarının kökünün kəsilməsinə səbəb olmasınlar. Bu qaydalara əməl etməyənlərə qarşı qanunvericiliyə uyğun sərt və ciddi tədbirlər görülür".

Məqalədə:
Xəbər lenti

Xəbər lenti