Bakı. Trend:
Ümumdünya Səhiyyə Assambleyasının 76-cı sessiyasında Qoşulmama Hərəkatı adından Azərbaycan Respublikasının səhiyyə naziri Teymur Musayev Bəyanat səsləndirib.
Nazirlikdən Trend-ə verilən məlumata görə, çıxışına Ümumdünya Səhiyyə Təşkilatının (ÜST) təsis olunmasının 75-ci ildönümü münasibətilə Qoşulmama Hərəkatına (QH) üzv ölkələr adından təbriklə başlayan səhiyyə naziri Teymur Musayev qeyd edib ki, QH üzv ölkələri hər bir insanın tibbi xidmətlərə çıxışının təmin edilməsinin mühüm məsələ olduğunu vurğulayır.
Qoşulmama Hərəkatı SARS-COV-2 pandemiyasının nəticələrinin uzun müddətdə idarə olunması üçün ÜST-lə əməkdaşlığa hazırdır. Hərəkat pandemiyanın təsirlərinin aradan qaldırılması üçün qlobal səylərin gücləndirilməsində mühüm rol oynayıb. Belə ki, peyvəndlərə bərabər, vaxtında və universal çıxışın təmin edilməsinə dair qətnamə BMT-nin İnsan Hüquqları Şurası tərəfindən qəbul edilib. Həmçinin QH üzv ölkələrin COVİD-19 a qarşı tibbi və humanitar ehtiyaclarına dair məlumat bazası istifadəyə verilib. Hərəkat COVİD-19 a qarşı vaksin ianə edən ölkələrin səylərini yüksək qiymətləndirir.
"Qoşulmama Hərəkatı 2 mart 2023-cü il tarixdə Bakıda Azərbaycan Respublikasının prezidenti cənab İlham Əliyevin sədrliyi ilə keçirilmiş COVİD-19 a cavab olaraq pandemiyadan sonrakı qlobal canlanma üzrə Hərəkatın Təmas Qrupunun Sammit səviyyəli görüşünü alqışlayır.
QH üzv ölkələri səhiyyədə təhlükəsizlik və daha güclü səhiyyə sistemlərini təmin etmək üçün Universal Səhiyyə Əhatəliliyinə və 2030-cu ilə kimi səhiyyə ilə bağlı Davamlı İnkişaf Məqsədlərinə nail olmağa sadiqliyini bir daha ifadə edir", - nazir əlavə edib.
Sonda Teymur Musayev QH-nın Ümumdünya Səhiyyə Assambleyasının 76-cı sessiyasında iştirak edən dövlətlərin gələcək pandemiyalara daha hazırlıqlı olması üçün səhiyyədə effektiv tədbirləri prioritetləşdirməkdə həmrəyliyinə ümidvar olduğunu bildirib.
