"DAK-ın tarixində ilk dəfə olaraq belə geniş tərkibdə Türkiyəyə böyük səfərimizi həyata keçirdik". Bu fikirləri Trend ə açıqlamasında hazırda Türkiyədə səfərdə olan Dünya Azərbaycanlıları Konqresinin (DAK) sədri Cavad Derəxti deyib.
O qeyd edib ki, DAK-ın geniş tərkibli nümayəndə heyətinin Türkiyə Cümhuriyyətinə səfəri uğurlu keçib. C.Derəxtinin sözlərinə görə, nümayəndə heyəti Türkiyənin rəsmi şəxsləri, aparıcı siyasi partiyalarının, qeyri-hökumət təşkilatlarının, vəqflərin rəhbərləri, ziyalılar, elm adamları, diaspor nümayəndələrimizlə çoxsaylı görüşləri olub. Həmçinin nümayəndə heyəti üzvləri Türkiyənin telekanallarında çıxışlar edib. DAK-ın sədr müavini, Azərbaycanın millət vəkili Həvva Məmmədova bu gün - dekabrın 2-də TQRT kanalının qonağı olub.
DAK sədri C.Derəxtinin başçılıq etdiyi nümayəndə heyəti Ankarada olarkən Xarici İşlər Nazirliyində Türkiyənin Azərbaycandakı yeni səfiri Hüseyn Avni Karslıoğlu, Böyük Millət Məclisində Türkiyə-Azərbaycan parlamentlərarası Dostluq Qrupunun rəhbəri Haluk İpəklə görüş keçirib. DAK nümayəndələri həmçinin Türkiyənin aparıcı siyasi partiyaları - sosial demokratları təmsil edən Cümhuriyyət Xalq Partiyasının başqanı Deniz Baykalla, Millətçi Hərəkat Partiyasının başqanı Dövlət Baxçalı, Doğru Yol Partiyası və Böyük Birlik Partiyası başqanları Ankarada olmadığı üçün onların müavinləri ilə görüşlər keçiriblər. Bundan başqa, bir neçə tanınmış araşdırma mərkəzlərində olublar.
Dekabrın 1-də isə Azərbaycan diaspor nümayənlərinin də iştirakı ilə DAK-ın konfransı olub. C.Derəxtinin sözlərinə görə, tədbirdə Türkiyədə təhsil alan güneyli-quzeyli azərbaycanlı tələbələr, diaspor təmsilçiləri, DAK-ın Rusiya, Ukrayna, ABŞ, Almaniya, Hollandiya, İçveç nümayəndəlikləri və başqa qonaqlar iştirak ediblər: "Roma Papası burada səfərdə olduğundan yollar bağlanmışdı, bu səbəbdən bəzi soydaşlarımız tədbirə gələ bilmədi. Amma onlarla bu gün görüşəcəyik. Toplantını Türkiyənin media qurumları da işıqlandırıb. Son görüşümüz Süleymaniyyə Kültür Mərkəzində Türk Dünyası Araşdırmaları Vəqfinin başqanı, professor Turan Yazqanla olacaq, ona plakat təqdim edəcəyik. Bununla görüşlərimiz və səfərimiz yekunlaşır. Bu günün sonunda hər kəs öz ölkəsinə qayıdacaq" - deyə C.Derəxti bildirib. O, ümumilikdə səfərin uğurlu keçdiyini deyib.
