Azərbaycan Respublikasının Daxili İşlər, Sosial Müdafiə nazirlikləri və Xarici Ölkələrdə Yaşayan Azərbaycanlılarla İş üzrə Dövlət Komitəsinin məsul şəxslərindən ibarət nümayəndə heyəti Rusiyada yaşayan azərbaycanlıların miqrasiya problemləri ilə tanış olmaq üçün Moskvada səfərdədirlər. Bu barədə Trend ə Ümumrusiya Azərbaycanlıları Konqresinin (ÜAK) Moskva şəhər təşkilatının sədri İlqar Hacıyev məlumat verib.
Azərbaycanın rəsmi nümayəndələri azərbaycanlılara hüquqi yardım məqsədilə Moskvada yaradılmış qərargahda olublar, qərargaha müraciət edən soydaşlarımızla söhbət aparıblar. Nümayəndələr həmçinin ÜAK-ın mərkəzi ofisində qurumun rəhbərliyi ilə görüş keçiriblər. Sonra nazirlik əməkdaşları Moskvadakı bəzi bazarlara çıxaraq orada azərbaycanlıların fəaliyyəti, problemləri ilə tanış olublar. Azərbaycanın nümayəndələri Rusiyanın Daxili İşlər Nazirliyinin, Federal Miqrasiya Xidmətinin rəsmi şəxsləri ilə də görüş keçiriblər, bu ölkədə müvəqqəti qeydiyyatla və qeydiyyatsız yaşayan soydaşlarımzın vəziyyəti barədə müzakirələr aparılıb. Azərbaycanın Daxili İşlər Nazirliyinin nümayəndəsi Rusiyada miqrantlara qarşı bəzi tələblərin yumşaldılmasını təklif edib. Məsələn, azərbaycanlılardan pasportlarının tərcüməsinin tələb edilməməsi təklif olunub, çünki ingilis dilini bilənlər üçün latın qrafikalı Azərbaycan dilini oxumaq çətin deyil. Həmçinin təklif olunub ki, miqrasiya kartında Rusiyaya başqa məqsədlə gəldiyini göstərən miqrantların sonradan işləyə bilməməsi kimi qadağa yumşaldılsın.