Azərbaycan, Bərdə / Trend müxbir Ş.Cəliloğlu/ Azərbaycanın Bərdə Rayon Mərkəzi Xəstəxanasının baş həkimi Etibar Mirzəyev cümə axşamı bildirib ki, rayonun ucqar kəndlərində yeni tibb məntəqələrinin inşa olunması və digərilərinin isə əsaslı təmir olunması üçün Səhiyyə Nazirliyinə müraciət edib.
Mirzəyevin sözlərinə görə, Bərdənin ucqar ərazilərində yerləşən Darağacı, Nağılar, Həsənli, Tağılar və Dağlar kəndlərində tibb məntəqələri yoxdur. Ona görə də sakinlər ilkin ambulator yardım üçün qonşu kəndlərdə yerləşən məntəqələrə üz tuturlar.
Onun sözlərinə görə, rayonun 11 kəndində xəstəxana, 32 kənd həkim ambulatoru, 57 feldşer mama məntəqəsi fəaliyyət göstərsə də, 17 tibb məntəqəsinin əsaslı təmir və bərpa işlərinə ehtiyacı var. Bunun üçün isə təxminən 350 min manat vəsait tələb olunur. Digər üç məntəqə - Mustafa Ağalı, Alpout, Çolayır kəndlərində isə yeni bina inşa olunmalıdır.
Son üç ildə qeyri-hökumət təşkilatlarının köməyi ilə səkkiz tibb məntəqəsinin binası yenidən inşa olunub, 15-ində isə təmir işləri aparılıb.
Bərdə paytaxt Bakıdan 380 kilometr qərbdə yerləşir.