Azərbaycan, Bakı, 5 iyul/müx.TrendLife Fəridə Məhərrəmqızı/"Space" telekanalında yayımlanan "Azəristar-2007" müsabiqəsi sona yaxınlaşmaqdadır. Artıq müsabiqənin finalına vəsiqə qazanan 12 iştirakçının adı məlumdur. Layihə rəhbəri Kemal Cenk İçtenin TrendLife- a verdiyi məlumata görə, "Azəristar-2007" müsabiqəsinin 13-cü həftəsi yarımfinal mərhələsinə təsadüf edəcək.
"Həmin həftə 12 finalçı çıxış edəcək. Səhərisi gün səs faizlərinə görə 9 finalçı nominasiya qazanıb müsabiqəni tərk edəcək. Qalan 3 nəfərsə final gecəsində "GEN MMC" tikinti şirkətinin təqdim etdiyi mənzil uğrunda yarışacaq" - deyə o bildirib.
Qeyd edək ki, "Azəristar"ın final mərhələsi Heydər Əliyev adına Sarayda keçirilməli idi. "Hazırda sarayda təmir işləri getdiyi üçün final gecəsi Rəşid Behbudov adına Mahnı Teatrında olacaq. Final gecəsinə bir neçə gün qalıb. Finalda qalibin adı açıqlanacaq. Bir sıra tanınmış estrada ulduzları da final gecəsinin qonağı olacaq. Hazırda mənzil uğrunda sağlam mübarizə gedir" - deyə layihə rəhbəri bildirib.
Kemal Cenk İçten müsabiqə ətrafında gəzən bir sıra şayiələri təkzib edərək bildirib ki, qalibə mənzil açarlarının verilməyəcəyi barədə deyilənlər paxıl insanların uydurmasıdır: "Müsabiqənin başa çatmasına bir neçə gün qalıb. Görəcəklər ki, ev var, yoxsa yox".
Qeyd edək ki, Gənclər Mərkəzi İctimai Birliyi də müsabiqədə qalib olacaq finalçıya qiymətli mükafatlar təqdim edəcək.