Azərbaycan, Bakı, 14 iyul /müx. "TrendLife" Tayfun Eloğlu/ Artıq tamaşaçılar onun üçün çox darıxıb. Söhbət "ATV-maqazin" verilişinin aparıcısı İlkin Həsənlidən gedir. O, hərbi xidmətdə öz kişilik borcunu yerinə yetirib doğma şəhərinə qayıdıb. Əsgərliyin necə keçməsi barədə kiçik serjant "TrendLife"a bunları söylədi.
- Əsgərlik doğrudan da əsl kişilik məktəbidir. İstər-istəməz uzaqgörən və ciddi olursan. Mən Xudatda sərhəd qoşunlarında xidmətdə olmuşam. Təzə-təzə çətn idi, sonra isə hər şey yağ kimi getməyə başladı.
- Bəs sən dövlət sərhədini pozan şəxsin saxlanmasında iştirak etmisən?
- Cinayətkar yaxalamamışdıq. Heç bir siçan da sərhədi keçməmişdi. Amma çox istərdim.
- Bəzi gənc müğənnilər hərbi xidmətdən bir bəhanə ilə gizlənirlər ki, əsgər çətinliyini hiss etməsinlər. Tək onlar yox, bir çoxları. Bəs sənin hərbi xidmətdən yayınan uşaqlara münasibətin necədir?
- Əlbəttə ki, bu düzgün deyil. Hətta Türkiyədə belə bir yazılmamış qanun var: əsgərlik çəkməyən oğlana qız vermirlər. Həm də etiraf edək ki, bir neçə yoldaş masa arxasında oturub əsgərlikdən söhbət edəndə sən də nəsə danışmağa söz tapırsan. Bu, insanın çox xoşuna gəlir.
- Sənin məşhurluğun əsgər həyatına necə təsir etdi?
- Birinci ay mən İlkin Həsəni idim. Sonra isə mənim komandirim gördü ki, mən əsgər ola bilərəm.
- Bəs əsgərlik sənin xasiyyətini dəyişdirdi?
- Mən bəzi şeylərə artıq çox ciddi yanaşıram. Hətta zəngli saatsız səhər saat 9-da dura bilirəm. Duran kimi idmanla məşğul oluram.
- 45 saniyə ərzində geyinmək?
- (Gülür). Yox, o yoxdu.
- Bəs işin üçün darıxmamısan?
- Əlbəttə darıxmışam. Hətta lap çox. Artıq bu gün "ATV-maqazini" və "Bozbaş-pikçersi" aparacam. Payızda isə yeni binaya köçəndə işimlə paralel yeni intellektual-əyləncəli layihə üzərində çalışacam.
- Bəlkə bəzi aparıcılar kimi sən də estrada səhnəsinə çıxasan?
- Yox. Əlbəttə, mən belə insanlara pis baxmıram, amma əgər yaxşı aparıcısansa, elə elə də qal. Yoxsa insanlar çaş-baş qalacaqlar ki, müğənnisən, yoxsa aparıcı.
- Bəs ailə qurmaq necə?
- Bir az işlə tutmur. Amma vaxtıdır. Hərçənd düzünü desəm, çox ailə mənə qızını etibar etmir. Elə hesab edirlər ki, mən özündən deyənəm. Amma inanın, mən sadəcə ailə xoşbəxtliyi istəyirəm.