Azərbaycan, Bakı / Trend , müxbir Z.Səfərov/ Qadınlar arasında böyük şahmat turnirinin təntənəli açılışı sentyabrın 3-də Bakıda keçiriləcək.
Milli Federasiyadan Trend ə verilən məlumata görə, yarışda səkkiz ölkənin - Polşa, Gürcüstan, Ukrayna, Hindistan, Bolqarıstan, İsveç, Latviya və Azərbaycanın şahmatçıları iştirak edəcək. Yarış iştirakçıları dairəvi sistem üzrə oynayacaqlar. Məhz bu sistemin yekunlarına əsasən, qalib və digər mükafatçılar müəyyənləşdiriləcək. Respublikanı bu turnirdə bir sıra şahmatçı, o cümlədən dünya çempionatına vəsiqə qazanmış İlahə Qədimova təmsil edəcək.
Bir neçə il əvvəl qadınlar arasında şahmat turniri Şəkidə keçirilib. Bu turnirin təşkilatçılıq səviyyəsi qonaqlar və çoxsaylı mütəxəssislər tərəfindən yüksək qiymətləndirilib.