Azərbaycan, Bakı, 25 aprel /Trend/
Yaponiyanın Kakamigahara şəhərində keçirilən London Yay Olimpiya Oyunlarının təsnifat yarışında mübarizə aparan Azərbaycanın qadın otüstü hokkeyçilərdən ibarət milli komandası bu gün turnirdə ilk oyununu keçirib.
Azərbaycan Otüstü Hokkey Federasiyasından Trend-ə verilən məlumata görə, rəqib dünya reytinq sıralamasında 23-cü yeri tutan Malayziya yığması olub. Matçın təxminən 15-ci dəqiqəsindən təşəbbüsə yiyələnən hokkeyçilərimiz ilk hissədə komandanın kapitanı Xatirə Əliyevanın vurduğu 2 qolla fasiləyə yollanıblar.
Qızlarımız ikinci hissədə malayziyalıların qapısından daha 2 top keçirərək (M.Məmmədova və Y.Muradi fərqləniblər) 4:0 hesablı qələbə qazanıblar.
Millimiz ikinci oyununu aprelin 27-də Belarus komandasına qarşı keçirəcək.