Azərbaycan, Bakı, 8 aprel /Trend/
Ötən həftə Azərbaycan idmançıları Bolqarıstanın Bansko şəhərində keçirilən dağ xizəyi üzrə çempionatda iştirak ediblər. Çempionat dəniz səviyyəsindən 1600 metr hündürlükdə yerləşən ərazidə baş tutub.
Milli Olimpiya Komitəsinin mətbuat xidmətindən Trend-ə bildiriblər ki, çempionatda iştirak edən iki Azərbaycan atleti - Patrik Brahner və Sedrik Notz müvafiq olaraq 4-cü və 23-cü yerləri tutublar. Elə həmin gün gənclər arasında keçirilən digər yarışlarda isə adıçəkilən atletlər müvafiq olaraq 6-cı və 19-cu yerləri tutublar.
Bütün yarışlar nəticəsində ortalama balına görə dağ xizəyinin slalom növü üzrə atlet Sedrik Notz Soçi 2014 Qış Olimpiya Oyunlarına lisenziya qazanmaqla bu idman növündə Azərbaycanın balansına 2-ci lisenziyanı yazıb.
Qeyd edək ki, digər atletimiz Patrik Brahner Soçi 2014 Qış Olimpiya Oyunlarına lisenziyanı 2013-cü ilin əvvəlində keçirilmiş yarışlar nəticəsində əldə etmişdi.