Azərbaycan, Bakı, 17 sentyabr /Trend/
Bakıda keçirilən şahmat üzrə Dünya Kubokunda 1\16 final mərhələsinin bütün iştirakçıları müəyyənləşib.
Trend-in məlumatına görə, Azərbaycan şahmatçısı Teymur Rəcəbov Dünya Kubokunun mətbuat xidmətinə açıqlamasında tay-brekdə İsrail təmsilçisi İlya Smirin üzərində qazanılan qələbə haqda danışıb: "Smirinə qarşı keçirdiyim hər iki oyun çətin oldu. Məhz buna görə onda hər şey tay-brekdə həll olundu. Təbii ki, Şəhriyar Məmmədyarov və Qədir Hüseynovla birgə 1/16 finala yüksəldiyim üçün çox şadam. Qarşıdakı mərhələlərdə də uğur qazanmaq istəyirəm. Bununla kifayətlənmək fikrində deyiləm. Əsas məqsəd iddiaçılar turnirinə vəsiqə qazanmaqdır. Çox istərdim ki, şahmatçılarımızdan biri final mərhələsinə vəsiqə qazansın".