"Avropada son 8 ildə ən çox sıçrayış edən çempionat Azərbaycan Premyer Liqasıdır" (FOTO)
Bakı. Trend:
Bu gün Peşəkar Futbol Liqasının (PFL) prezidenti postuna növbəti seçkilər keçirilib.
Trend quruma istinadən məlumat verir ki, AFFA prezidenti Rövnəq Abdullayevin rəhbərlik etdiyi seçkiyə Premyer Liqa klublarının nümayəndələri də qatılıblar.
Nəticələrə əsasən, Peşəkar Futbol Liqasının hazırkı prezidenti Ramin Musayev növbəti 4 ildə də prezident postunda fəaliyyət göstərəcək. Belə ki, seçicilərin hər biri R.Musayevin yenidən prezident seçilməsinə səs veriblər.
AFFA prezidenti PFL-in çempionatı yüksək səviyyədə təşkil etdiyini bildirib, qurumun işini qənaətbəxş saydı: “Çətin də olsa, PFL ilə birlikdə yüksək səviyyədə çempionat təşkil etmişik. Ən əsası, ədalətli təşkilatçılıq, eyni zamanda ədalətli hakimliyimiz olub. Mən PFL-ə tövsiyələrimi verdim. Gələn ilin may ayında Qəbələdə 8 klubun iştirakı ilə böyük turnir keçirəcəyik. İstəyirik, 2017/2018-ci illər mövsümündə azı 10 komandalı çempionat reallaşdıraq”.
R.Musayev ona göstərilən etimada görə təşəkkürünü bildirib və görülən işlərdən, eləcə də qarşıda duran planlardan bəhs edib: “Bu gün bizim çempionat UEFA tərəfindən aparılan sorğu nəticəsində 24-cü yerdədir. PFL yaranan ildə çempionatımız 44-cü pillədə qərarlaşmışdı. Biz 8 il ərzində 20 pillə irəliləməyə nail olmuşuq. Bu mənim yox, UEFA-nın sorğusudur. 54 ölkə arasında son 8 ildə ən çox sıçrayış edən çempionat Azərbaycan Premyer Liqasıdır. Dünyada isə PFL yaranana qədər 110-cu yerdə olsaq da, bu gün 38-ciyik. Düzdür, bununla əlimizi yanımıza salmırıq. Qarşıdakı illərdə daha da irəliləməyə çalışacağıq”.
PFL prezidenti əlavə edib ki, qurum Azərbaycan futbolunda vahid sistemlər formalaşdırıb: “Biz çempionatda vahid top tətbiq etdik, oyunlara çəkiliş qrupları göndəririk, 8 il ərzində keçirilən oyunların bütün videoyazıları var. Biz fəaliyyətimiz ərzində klublarla birgə çalışmışıq. Bunu seçki zamanı klub nümayəndələri də bildirdilər”.
R.Musayev prezident postuna tək namizəd olmasına da münasibət bildirib: “Mən güləşçi olmuşam, mübarizə aparmağı sevirəm. Hətta bir dəfə yarışda rəqibim gəlmədi. Buna görə çox üzüldüm. Bu gün də tək namizəd olmağım mənə yaxşı təsir etmədi. Yaxşı olardı ki, 2-3 namizəd olsun. Hər kəsin futbolda gördüyü işlərlə bağlı açıqlaması ilə tanış olardıq. Görərdik, kimin planları daha gözəldir, kim nə iş görüb. Rəqibim olmasa da, daha yaxşı işlər görməyə çalışacağam”.
