Bakı. Trend:
Türkiyə Qolf Federasiyasının (TGF) prezidenti Yıldırım Dəmirörən və Azərbaycan Qolf Federasiyasının (AGF) prezidenti Rauf Xəlilov iki ölkə federasiyaları arasında əlaqələrin inkişafı və möhkəmləndirilməsi məqsədilə əməkdaşlıq sazişi imzalayıblar.
Trend-in TurkicWorld-a istinadən məlumatına görə, Türkiyənin İstanbul şəhərinin Ataşehir rayonunda yerləşən TGF İstanbul ofisində keçirilən imzalanma mərasimində Yıldırım Dəmirörən və Rauf Xəlilov ilə yanaşı, Türkiyə Qolf Federasiyasının İdarə Heyətinin üzvləri İsmayıl Həsən Akçakayalıoğlu, Murat Karaduman, Serhat Soysal və Azərbaycan Qolf Federasiyasının sədr müavini Anar Əzimov, Azərbaycan Qolf Federasiyasının baş katibi Leyla Abbasova da iştirak ediblər.
Əməkdaşlıq müqaviləsinə məşqçi hazırlığı, gənclərin inkişafı proqramları, hakim hazırlığı, infrastrukturun inkişafı, oyunçuların beynəlxalq səviyyədə yarışmalarına imkan yaratmaq üçün yarış təşkilatları, ölkədə idmançıların sayının artırılması, texniki məsələlər üzrə qarşılıqlı təcrübə və digər sahələrdə birgə iş birlikləri daxildir.
Müqavilə çərçivəsində Türkiyə və Azərbaycan hər yaşdan olan qolf komandaları arasında bütün kateqoriyalar üzrə xüsusi matçlar və ikili düşərgələr təşkil edəcək.
"Bu gün Azərbaycan Qolf Federasiyası ilə imzaladığımız bu müqavilə ilə biz ilk növbədə qolf idman növünü iki qardaş ölkənin gəncləri arasında populyarlaşdırmağı hədəfləyirik. Biz milli və beynəlxalq tədbirlər və turnirlər təşkil etmək üçün birgə çalışmaqdan qürur duyuruq. Federasiyalarımız arasında təcrübə, texniki təcrübə və məlumat mübadiləsi aparmaq və ölkələrimizdə qolfun inkişaf etdirilməsi bizim üçün xoş bir haldır”, – deyə Türkiyə Qolf Federasiyasının prezidenti Yıldırım Dəmirörən bildirib.
Daha sonra Azərbaycan Qolf Federasiyasının prezidenti Rauf Xəlilov imzalanmış müqaviləyə münasibətini bildirərək, Azərbaycanda qolfun inkişafına hər cür dəstək vermək üçün hazır olduqlarını bildirib.
“Qolfun inkişafına sadiqliyimizin ən mühüm nümunəsi qardaş ölkəmiz Türkiyə ilə əməkdaşlıq müqaviləsinin imzalanmasıdır. Məqsədimiz qolfun inkişafı üzrə bilik, təcrübə və qabaqcıl təcrübələri bölüşmək, qolf turizmini təşviq etmək və beynəlxalq qolf tədbirlərini regionumuza cəlb etməkdir. Bu əməkdaşlıq qolfçularımıza və qolf həvəskarlarımıza bir-birindən öyrənmək, təcrübələrini bölüşmək və qolf oynamağa olan ortaq həvəsimiz vasitəsilə dostluğu gücləndirmək üçün əvəzolunmaz imkanlar verəcək”, - deyə o bildirib.