Bakı. Trend:
“Vilyarreal”ın norveçli hücumçusu Aleksandr Sorlot La Liqada mövsümü bombardir kimi bitirə bilməyəcək.
Trend İdman.biz-ə istinadən xəbər verir ki, onun arzuları mövsümün sonuncu - 38-ci turunda ürəyində qalıb.
“Osasuna” səfəri öncəsi bombardirlər siyahısında 1-ci olan ukraynalı Artyom Dovbikdən (24 qol) cəmi 1 qol geri qalan 28 yaşlı forvardın bu oyunda onu keçmək arzusu reallaşmayıb. Sorlot meydan sahiblərinin 1:0 öndə olduğu və davam edən matçın 17-ci dəqiqəsində zədələnərək yerini Xose Luis Moralesə verib.
Qeyd edək ki, bombardirlik mübarizəsində “Real”ın futbolçusu Cud Belingem 19 qolla 3-cü sıradadır.