Bakı. Ləman Zeynalova - Trend:
Vaşinqton və Ankara Türkiyənin Rusiyadan S-400 zenit-raket komplekslərinin satın alması məsələsini müzakirə edəcək.
Trend-in məlumatına görə, bunu Bakıda jurnalistlərə ABŞ dövlət katibi köməkçisinin Avropa və Avrasiya məsələləri üzrə müavini Corc Kent deyib.
O bildirib ki, Türkiyənin Rusiyadan həmin kompleksləri alması ABŞ rəsmi şəxsləri tərəfindən intensiv müzakirə olunur:
“Biz S-400-ü inteqrasiya olunmuş informasiya sistemlərinə təhlükə kimi görürük. Bizim aparıcı hərbi məmurlarımız bildirib ki, ölkədə eyni anda həm S-400, həm də F-35 ola bilməz. ABŞ öz mövqeyini Türkiyəyə açıq şəkildə bildirib, Türkiyə də öz mövqeyini açıq şəkildə bəyan edib. Biz müttəfiqimiz olan Türkiyə ilə S-400 sistemlərinin yaratdığı problemlərlə bağlı müzakirələri davam etdiririk. Türkiyə bildirib ki, S-400-lərin üçüncü ölkələrə göndərilməsi ssenarisi əsassızdır. Bu çox ciddi məsələdir və Türkiyə ilə ABŞ hələ ki, razılığa gəlməyib. Amma biz müzakirələrə davam edəcəyik”.