Bakı. Trend:
Cari ilin yanvar-iyun ayları ərzində gömrük orqanları tərəfindən 16 min 645 hüquqpozma faktı aşkar edilib.
Trend Dövlət Gömrük Komitəsinə istinadən xəbər verir ki, bu faktlardan 670-i cinayət xarakterli faktlar olub.
Bu ilin birinci yarımilində icraatına xitam verilən 4 cinayət işi və 4 cinayət xarakterli material üzrə dövlət mülkiyyətinə vurulan 988 min 265,1 manat ümumi ziyanın 857 min 183,78 manatlıq hissəsi və ya 86,73 faizi ödətdirilib ki, bu da ötən ilin müvafiq dövrü ilə müqayisədə 3 dəfə çoxdur.
Qeyd olunan dövr ərzində qabaqcadan əlbir olan bir qrup şəxs və ya mütəşəkkil dəstə tərəfindən qızıl məmulatlarının, iri vergi tutumlu aksizli və digər bu qəbildən olan malların qanunsuz gətirilməsi üzrə törədilən bir sıra cinayətlərin qarşısı alınıb, onların istifadə etdiyi qaçaqmalçılıq kanalları aşkar olunaraq zərərsizləşdirilib.
Gömrük orqanları tərəfindən cari ilin 1-ci yarımilində aşkar olunan cinayətləri törədən 682 nəfər (488 Azərbaycan vətəndaşı, 194 xarici) barəsində müvafiq tədbirlər görülüb, 63 nəfər təqsirləndirilən şəxs qismində cəlb edilib, 18 nəfər barəsində məhkəmə tərəfindən həbs, 1 nəfəri barəsində ev dustaqlığı qətimkan tədbiri seçilib, istintaq orqanı tərəfindən 11 nəfər barəsində polisin nəzarəti altına vermə, 33 nəfər barəsində isə başqa yerə getməmə qətimkan tədbiri seçilib.
Cari ilin yanvar-iyun ayları ərzində Azərbaycanın gömrük orqanları tərəfindən 15 min 975 inzibati xəta faktı aşkar edilib. Bu faktlarla əlaqədar 1075 hüquqi şəxs (o cümlədən, 468 xarici hüquqi şəxs) və 14 min 894 fiziki şəxs (o cümlədən 4447 xarici vətəndaş) barəsində inzibati tənbeh tətbiq olunub.