Azərbaycan, Bakı, 19 fevral/ " müxbir İ.Xəlilova/ "Azərbaycan İnvestisiya Şirkəti" SC-nin investisiya yatırdığı layihələrdən çıxışı 4-5 ildən sonra mümkündür. Bu barədə iqtisadi inkişaf nazirinin müavini Mikayıl Cabbarov məlumat verib.
Əsas strategiya İPO vasitəsilə Bakı Fond Birjasında açıq yerləşdirmə yolu ilə öz iştirak payını satmaqdan ibarətdir.
"Bizim məqsədimiz yerli fond birjalarının, qiymətli kağızlar bazarının inkişafından ibarətdir və İPO investorların cəlb edilməsi üçün effektli üsullardan biridir. Belə ki, səhmlərin bazar qiymətini fond birjası vasitəsilə müəyyən etmək mümkündür", - nazir müavini qeyd edib.
AİŞ minoritar səhmdar olaraq, layihələrdən çıxamq üçün ən effektli üsulu birja vasitəsilə öz səhmlərinin satışında görür.
Bu gün investisiya şirkəti altı layihədə iştirak edir və onlara 55,2 mln. manat investisiya yatırmaq qərara alınıb. İnvestisiya şirkətinin ilkin Nizamnamə kapitalı Azərbaycan Dövlət Neft Fondunun vəsaitləri hesabına 90 mln. manat səviyyəsində formalaşdırılıb.
Azərbaycan İnvestisiya Şirkəti tərəfindən minimal investisiya ölçüsü 1 mln. manat məbləğində həyata keçirilə bilər. AİŞ-in bir layihədə maksimal iştirak limiti və ya törəmə strukturunda onun kapitalının 25%-i ölçüsündə qoyulub. Gündəlik limit 18 mln. manat təşkil edir. AİŞ kapitalından hər hansı bir sənaye sahəsinə 35%-dək (31,5 mln. manat) investisiya yatırıla bilər. Bununla yanaşı, Müşahidə Şurasının xüsusi qərarı ilə bu bənd üzrə istisnalar ola bilər və buna görə də, 35 faiz oriyentir sayılır və təklif olunan layihələrin əhəmiyyəti və effektivliyindən asılı olaraq, bu limitdən kənara çıxış mümkündür.
