Azərbaycan, Bakı, 30 mart/ " müxbir İ.Xəlilova/ Avropa Yenidənqurma və İnkişaf Bankı (AYİB) idarəçiləri Şurasının mayın 18-19-da Kiyevdə (Ukrayna) keçiriləcək XVII iclası çərçivəsində baş tutacaq "Müasir iqtisadiyyatı irəli apararkən" işgüzar forumunda Azərbaycanın təqdimatının keçirilməsi planlaşdırılır.
Tədbirlərdə AR-in bankdakı idarəçisi, iqtisadi inkişaf naziri Heydər Babayevin başçılığı ilə Azərbaycanın nümayəndə heyətinin iştirak edəcəyi gözlənilir.
Avropa bankı Azərbaycanda özəl sektorun və regionların inkişafına yönəlmiş layihələrin reallaşdırılmasına maraq göstərir. Avropa bankının ölkənin nəqliyyat sektorunda inkişafına xüsusi diqqət ayrılır. AYİB artıq Bakı-Tbilisi-Qars dəmir yolunun tikintisi layihəsini maliyyələşdirməkdə maraqlı olduğunu bildirib. Bütün bu istiqamətlər 2007-ci ili mayında Kazanda, bankın ötən iclasında iqtisadi inkişaf naziri Heydər Babayev və AYİB biznes-qrupunun direktoru Olivye Dekam arasında imzalanmış danışıqlar protokolunda öz əksini tapıb.
AYİB 2008-ci ildə Azərbaycanda ümumi dəyəri 148-180 mln. avro olmaqla, 18 layihənin maliyyələşdirilməsi imkanını nəzərdən keçirir. Onlardan səkkizi kiçik layihələrdir və sahibkarların maliyyələşdirilməsinə yönəlib. Lakin iki-üç layihə sahibkarlıq fəaliyyətinin inkişafı ilə bağlıdır. Bank sektorunun gücləndirilməsi üçün 60 mln. avro ayrımaq planlaşdırılır. Bu vəsait orta və kiçik biznesin dəstəklənməsi, ipoteka kreditləşməsi və mikormaliyyələşdirmə üçün nəzərdə tutulub.
Bundan əlavə, ölkə hökumətilə, avtomobil yollarının yenidən qurulması, dəmir yolu infrastrukturunun təkmilləşdirilməsi istiqamətində layihələrin maliyyələşdirilməsi üzrə danışıqlar aparılır.
Azərbaycandan fəaliyyətə başladığı vaxtdan Avropa Bankının Azərbaycanın layihələrində maliyyələşdirmə portfeli $1 mlrd. təşkil edir. Birgə maliyyələşdirilmiş layihələr nəzərə alınmaqla, portfel $4 mlrd.-dək çatır. 2007-ci il iyunun 30-da AYİB 61 layihənin reallaşdırılmasına 482,4 mln. avro ayırıb.
Məqalə müəllifinin ünvanı: [email protected]
