Azərbaycan, Bakı, 02 may/ " müxbir İ.Xəlilova/Azərbaycan parlamenti Əhalinin Sosial Müdafiəsi Dövlət Fondunun 2008-cü il büdcəsinin parametrlərinə düzəlişləri təsdiq edib. Bu düzəlişlərə əsasən, Fondun gəlirləri və xərcləri, hər bir maddə üzrə 136,867 mln. manat artaraq, 1 405,515 mln. manata çatıb.
Parlamentin bugünkü iclasında Fondun sədri Səlim Müslümov bildirib ki, Fondun əlavə gəlirlərinin 74,5 faizi sosial sığorta ödəmələri üzrə yığımların, 24,5 faizi isə dövlət büdcəsindən transfertlərin artırılması hesabına təmin ediləcək. Təsdiq edilmiş büdcədə məcburi sosial sığorta üzrə daxilolmalar 11,1 faiz artaraq, 1019,015 mln. manata, dövlət büdcəsindən edilən transfertlər isə, 10 faiz artaraq 385 mln. manata çatıb.
Dövlət Fondunun məxaric strukturunda 131,1 mln. manat həcmində əlavə xərclər əhaliyə pensiya və müavinətlərin ödənilməsinə, 5,767 mln. manat isə Fondun saxlanılmasına, pensiya ödəmələrinin bank xidməti üzrə xərclərin artırılmasına və digər məqsədələrə yönəldiləcək.
Düzəlişlərə əsasən, 2008-ci ildə Fond əhaliyə pensiyaların ödənilməsinə 1348,513 mln. manat yönəltməyi planlaşdırır. 2008-ci il yanvarın 1-ə ƏSMDF-in mərkəzi aparatı və yerli orqanlarının hesabında qalan 1 975 min manat vəsait Fondun 2008-ci ildəki xərclərinin maliyyələşdirilməsi üçün Dövlət Fondunun büdcəsinə yönəldiləcək.
Dövlət Fondunun büdcəsinə edilən dəyişikliklər əhalinin aztəminatlı təbəqələrinin sosial müdafiəsi üzrə dövlət qayğısı çərçivəsində, pensiyaların və müavinətlərin artırılmasına olan zərurətlə bağlıdır.
"Bu xərcləri ölkənin yaşayış minimumunun məbləğinə yaxınlaşdırmaq məqsədilə hər il Dövlət Fonduna dövlət büdcəsindən transfertlər həyata keçirilir, - Müslümov qeyd edib. Fondun məxaric büdcəsinin 96 faizi pensiya və müavinətlərin ödənilməsi üçün nəzərdə tutulub ki, bu da ötən illərlə müqayisədə 31 faiz çoxdur".
Onun sözlərinə görə, son illərin statistikası da ölkədə doğum hallarının artdığını təsdiqləyir. Bununla əlaqədar olaraq, növbəti illərdə bu istiqamətdə xərclər artırılacaq.
İqtisadi İnkişaf Nazirliyinin hesablamalarına əsasən, birinci rübün yekunları üzrə orta aylıq əmək haqqı 230 manatdan 278 manatadək artacaq və bu, məcburi sosial sığorta üzrə daxilolmaların genişlənməsi üçün baza yaradır. Bununla əlaqədar, Fondun büdcəsinə edilən düzəlişlər zamanı hesablamalar büdcə təşkilatları işçilərinin əmək haqqlarının və qeyri-büdcə təşkilatlarından sosial sığorta üzrə daxilolmaların artmasına müvafiq olaraq, iki istiqamətdə aparılıb.
Mayın 2-ə olan rəsmi məzənnə - 0,829 AZN/USD
Müəlliflə əlaqə saxlamaq üçün elektron ünvan: [email protected]
