Azərbaycan, Bakı, 13 iyun/ Trend Cap , müxbir İ.Xəlilova/ Azərbaycan hökuməti zibilin yandırılması üzrə birinci zavodu 20 il müddətində Fransanın CNİM şirkətinin idarəsinə verməyə hazırdır. Bu barədə nazirliyin investisiya siyasəti şöbəsinin rəisi Əsgər Ələkbərov məlumat verib. Bu müddət başa çatdıqdan sonra, zavodun idarə edilməsi üzrə müqavilənin daha 10-15 il uzadılacağı ehtimalı istisna deyil.
CNİM-in nümayəndələri zavodun tikintisinə dair müqavilə üzrə danışıqlarda iştirak etmək üçün hazırda Bakıdadırlar.
"Tikintinin həcmi və layihənin spesifikasını nəzərə alaraq, danışıqlar məsləhətçilər qrupu ilə birgə aparılsa da, belə növ müqaviləni qısa müddətə bağlamaq mümkün deyil, - Ələkbərov qeyd edib. Buna görə də danışıqlar daha bir ay ərzində davam etdiriləcək".
Tenderdə dörd şirkət iştirak edib - Fransanın CNİM, Avstriyanın EVN, Almaniyanın Enconi və Rusiyanın "Moskekostroy/Mosspeçstroy" şirkətləri. Şirkətlərin zavodun tikintisi üçün təklif etdikləri məbləğ 250 mln - 450 mln. avro arasında olub. Ələkbərovun sözlərinə görə, İqtisadi İnkişaf Nazirlyi CNİM ilə danışıqlar zamanı onun təklif etdiyi məbləğin azaldılmasına nail olub.
Zavodun tikintisi üzrə xərclər dövlətin hesabına ödəniləcək. Lakin, Ələkbərov xarici kreditlərin cəlb edilməsi ehtimalını istisna etmir. 2008-ci il üçün Dövlət İnvestisiya Proqramında bu məqsədlər üçün ilkin olaraq 130 mln. manat nəzərdə tutulub.
CNİM layihəsi tikinti işlərinin 36 ay ərzində başa çatdırılmasını nəzərdə tutur və müvafiq olaraq, hər il dövlət büdcəsində bu məqsədlər üçün vəsait nəzərdə tutulacaq.
Zavodun Balaxanıda, poliqon ərazisi yaxınlığında tikilməsi nəzərdə tutulub. Onun illik gücü 500 min ton təşkil edəcək. Podratçı üçün əsas şərt müəssisənin ən yaxşı texnologiya üzrə tikilməsi və enerjinin əldə edilməsidir. CNİM qismən onun qrupuna daxil olan Martin şirkətinin texnologiyasından istifadə etmək niyyətindədir.
Hazırda podratçı ilə qazın alınması (zibilin yandırılması üçün), Tarif Şurasının təyin etdiyi qiymətlə şəbəkəyə (hələ dəqiqləşdirilməyib - "Azərenerji" və ya "Bakıelektrikşəbəkə") satılacaq elektrik enerjisinin istehsalı şərtləri müzakirə olunur.
Elektrik stansiyasının illik gücü 231 MVt olacaq.
Rəsmi məlumatlara görə, hər il Bakı və onun ətrafında 1 mln. ton məişət tullantısı toplanır.
Müəlliflə əlaqə saxlamaq üçün elektron ünvan: [email protected]
