Azərbaycan, Bakı, 07 avqust/ Trend , müxbir A.Bədəlova/ İllik inflyasiya səviyyəsi qiymət sabitliyi əlaməti hesab edilən səviyyədən (2 faiz) yüksək olacaq. Bu barədə cümə axşamı Avropa Mərkəzi Bankının iclasının yekunlarına dair keçirilən mətbuat konfransında AMB-nin rəhbəri Jan-Klod Trişe məlumat verib.
Trişenin sözlərinə görə, inflyasiya səviyyəsi 2009-ci il ərzində azalmağa başlayacaq.
"Ortamüddətli üfüqdə qiymət sabitliyi üçün risklər yüksək olmaqda davam edir. Bundan əlavə, onlar son aylar ərzində artıb. Bu risklərə qida məhsulları və enerji daşyıcılarının qiymətlərinin gələcəkdə artması mümkünlüyü daxildir", - Trişe bildirib.
"Eurostat" statistika bürosunun ilkin məlumatlarına əsasən, 2008 - ci ilin iyulunda Avrozonaya daxil olan 15 ölkədə inflyasiya yeni tarixi maksimuma - illik hesablamada 4,1 faizə çatıb. Cari ilin iyununda istehlak qiymətləri artımı mayda 3,7 faizə qarşı 4 faiz təşkil edib.
Trişenin sözlərinə görə, 2008-ci ilin ortalarında ÜDM-in real artımı birinci rübə nisbətən nəzərəçarpacaq dərəcədə aşağıdır.
"ÜDM-in artımının zəifləməsi neftin və qida məhsullarının yüksək qiymətləri kimi amillərlə əlaqədardır", - Trişe bildirib.
AMB rəhbəri bildirib ki, dünya iqtisadiyyatının artımı tədricən olsa da, əvvəlki kimi, kifayət qədər davamlıdır və bu, ilk növbədə, inkişaf edən iqtisadiyyatların dayanıqlı artımı hesabına baş verir.
Trişenin sözlərinə görə, bu, avroya olan xarici tələbatı dəstəkləməlidir.
"Ortamüddətli perspektivdə avronun baza göstəriciləri kifayət qədər davamlıdır. Məşğulluq səviyyəsi əhəmiyətli dərəcədə artıb, işsizlik isə, aşağı səviyyədədir", - Trişe söyləyib.
Müəlliflə əlaqə saxlamaq üçün elektron ünvan - [email protected]