Azərbaycan, Bakı, 16 avqust/ Trend , müxbir İ.Xəlilova/ Avqustun 1-nə olan vəziyyətə əsasən, Azərbaycanda rəsmi olaraq 45 028 nəfər işsiz kimi qeydiyyatdan keçib və onların 47,5 faizi qadındır. Bu barədə Dövlət Statistika Komitəsindən məlumat veriblər. Yanvar-iyul ərzində işsizlərin sayı 11,1 faiz, iyul ərzində isə 0,3 faiz azalıb. Ölkədə bir boş yerə dörd işsiz iddia edir.
Hesabat dövrü ərzində ölkənin əməkqabiliyyətli əhalisi 4309 min nəfər olub. Onların 4037 min nəfəri məşğuldur. Bununla yanaşı, 1396 min nəfər muzdla işləyir.
Muzdla işləyənlərin 13,3 faizi sənaye sahəsində, 3,7 faiz - tikinti, 3,1 faiz - kənd, meşə təsərrüfatı, balıqçılıq sahələrində məşğuldur. Xidmətlər sahəsində çalışanların 37,8 faizi təhsil, 14,9 faiz - səhiyyə və sosial xidmətlər, 8,8 faiz - nəqliyyat, rabitə, 7,9 fiaz - kommunal, sosial və şəxsi xidmət sahələrində, 5 faiz - daşınmaz əmlakla, icarə ilə əməliyyatlarda, 4,6 faiz - dövlət idarəsi və müdafiə sahəsində, 0,7 faiz - topdan və pərakəndə satış, avtomobil, məişət məmulatları və şəxsi istifadə vasitələrinin təmiri, 0,2 faiz digər sahələrdə cəmləşib.
Yanvar-iyunda iqtisadi fəaliyyətlə məşğul olan əcnəbilərin sayı 4,9 min nəfər olub. Onlardan 1,5 mini sənaye, 1,3 min - tikinti, 1 min - daşınmaz əmlakla əməliyyatlar, 0,5 min - ticarət, 0,3 min təhsil sahələrində, 0,3 min nəfər isə digər sahələrdə çalışıb.
İşsizliyə görə müavinətin orta məbləği 112,7 manatdır.
Avqustun 16-na olan cari məzənnə - 0,8142 AZN/USD.
Müəlliflə əlaqə saxlamaq üçün elektron ünvan: [email protected]