Azərbaycan, Bakı, 08 sentyabr / Trend , müxbir S.Babayeva/ "Bu gün Azərbaycanda 4,6 mln. ha torpaq sahəsi kənd təsərrüfatı istehsalı üçün yararlıdır", - Dövlət Torpaq və Xəritəçəkmə Komitəsinin sədri Qərib Məmmədov bazar ertəsi bildirib. Bu sahədən 1,6 mln. ha suvarılan torpaqların payına düşür.
Onun sözlərinə görə, Komitə "2008-2015-ci illərdə Azərbaycan əhalinin ərzaq məhsulları ilə etibarlı təminatı üzrə Dövlət Proqramı" çərçivəsində ilk növbədə torpaq sahələrinin inventarlaşdırılmasını aparacaq, torpağın keyfiyyəti və miqdarını, onun çirklənmə dərəcəsini müəyyən edəcək.
"İnventarlaşdırmanın məqsədi məhsul istehsalı üçün yararlı sahələrin istehsala cəlb edilməsi və ölkədə ərzaq təhlükəsizliyinin təmin edilməsidir", - Məmmədov bildirib.
Komitə rəhbəri bildirib ki, Dövlət Proqramına müvafiq olaraq, inventarlaşdırmadan əlavə torpaq kadastrı hazırlanacaq, keyfiyyət və kəmiyyət qeydiyyatı, torpaqların iqtisadi qiymətləndirilməsi və sair aparılacaq.
1996-cı ilədək ölkədəki bütün torpaq sahələri dövlətin balansında olub. Lakin sonradan kənd təsərrüfatı islahatları nəticəsində torpaqlr üç mülkiyyət növü arasında paylanıb: 56,9 faiz dövlət, 23,5 faiz bələdiyyə və 19,6 faiz özəl torpaqlar.