Azərbaycan, Bakı, 17 sentyabr / Trend , müxbir İ.Xəlilova/ Beynəlaxalq maliyyə təşkilatları gürcü-osetin münaqişəsinin Azərbaycan iqtisadiyyatının vəziyyətinə təsirini qiymətləndiriblər. Ölkə hökumətindən çərşənbə günü verilən xəbərə görə, bu monitorinq Asiya İnkişaf Bankı (AİB) və Dünya Bankı (DB) tərəfindən keçirilib.
Bankın regional bölməsinin iqtisadçısı Filip Çanqın başçılıq etdiyi AİB-in missiyası nazirlik və idarələr, özəl şirkət və biznes-assosiasiyaları ilə məsləhətləşmələr aparıb. Bundan əlavə, Gürcüstandakı hadisələrin iqtisadiyyata təsirinin qiymətləndirilməsi üçün DB-nin Azərbaycan üzrə aparıcı iqtisadçısı Kristos Kostopolus ölkə hökuməti ilə ümumiqtisadi dialoq aparıb.
Ümumilikdə, iqtisadçılar hesab edirlər ki, belə vəziyyət birdəfəlik xarakter daşıyır və davamlı təsirə malik olmayacaq. Gürcüstan sərhədindən yüklərin tranziti ilə bağlı yaranan problem buna dəlalət edir. Belə ki, bu problem yalnız neft və neft məhsulları yüklərinin ixracının azalmasına deyil, yerli istehsalçılar üçün xammal materiallarının gətirilməsinə də təsir edib. Bunun nəticəsində bir sıra milli müəssisələr, o cümlədən "Azəralüminium", İmişli şəkər zavodu öz fəaliyyətini müvəqqəti dayandırmağa məcbur olmuşdu. Lakin hazırda bu müəssisələr əvvəlki rejimdə işləyir.
"Baker& Mckezie Limited"in Bakı ofisinin idarəçi tərəfdaşı Daniyel Metyu bir müddət əvvəl bildirib ki, Gürcüstandakı hadisələr Azərbaycana yatırılan potensial sərmayələrin azalmasına gətirəcək.
"Sərmayə axını üçün regionda sabitlik başlıca amildir: sabitlik azalarsa, sərmayə yatırımları buna müvafiq azalır, - o hesab edir. - Gürcü-osetin münaqişəsi Azərbaycana mənfi təsir göstərib".
Lakin iqtisadi inkişaf naziri Heydər Babayev hesab edir ki, Azərbaycan Gürcüstandakı hadisələrlə əlaqədar xarici sərmayələrin Azərbaycandan axması problemi ilə qarşılaşmayıb.
"Bir ölkə problemlə üzləşən zaman qonşu ölkələrə sərmayə axını artır, - nazir bildirib. - Ümumilikdə isə regionda vəziyyətin qeyri-sabit olması ilə əlaqədar sərmayələrin ölkədən axması da müşahidə oluna bilər".
Rusiyadan fərqli olaraq, Azərbaycan belə problemlə üzləşməyib.
Sentyabrın 17-nə olan cari mübadilə məzənnəsi -- 0,814 AZN/USD.
Müəlliflə əlaqə saxlamaq üçün elektron ünvan: [email protected]
