Azərbaycan, Bakı, 04 noyabr/ Trend , müxbir Ü.İsmayılova/ "Azərbaycan banklarının istehlak kreditləşdirməsini dayandırmasının təsirini yalnız biznesi bank sektoru ilə birbaşa bağlı olan sığorta şirkətləri hiss edəcək", - Azergarant Sığorta Şirkətinin İdarə Heyəti sədrinin müavini Şükür Hüseynov çərşənbə axşamı bildirib.
"Bu daha çox, əsasən, bank kreditləşdirməsi zamanı girov qoyulan əmlakın sığortası ilə məşğul olan iri sığorta şirkətlərinin biznesinə təsir göstərəcək", - Hüseynov bildirib.
Banklarla sıx işləyən sığorta şirkətləri əsas sığortanın üç növü - girov avtomobilin, girov əmlakın sığortalanması və borc götürənlərin həyatlarının fərdi sığortası növləri üzrə xidmət göstərirlər.
Hüseynovun sözlərinə görə, bu üç sığorta növünün xüsusi çəkisi şirkətlərin sığorta haqlarının təxminən 80 faizini təşkil edir ki, bu da onların gəlirlərinin xeyli azalmasından xəbər verir.
Azərbaycanın sığorta bazarında sığortanın təxminən 40 növü mövcuddur və bu bazar fəaliyyətini davam etdirir. "Düşünürəm ki, bazarın həcminin azalması normal iqtisadi təzahürdür. O, müvəqqətidir -vaxt keçdikcə əvvəlki rejimdə işləyəcək", - Hüseynov bildirib.
Əksər yerli banklar dünya maliyyə böhranının təsiri altında avqustda istehlak kreditlərinin, o cümlədən avtomobil və daşınmaz əmlakın alınmasına kreditlərin verilməsini dayandırıblar. Hazırda istehlak kreditlərinin verilməsi qismən bərpa edilsə də, banklar daha ehtiyatlı siyasət aparırlar və kreditləşdirmədə əvvəlki kimi kütləvi xarakter müşahidə edilmir.
Azergarant Sığorta Şirkəti sığorta bazarında 1993 - cü ildən fəaliyyət göstərir, dördü icbari olmaqla, 26 növ sığorta xidməti təklif edir. Şirkətin Nİzamnamə kapitalı 1 mln. manatdır. Azərbaycanda 28 sığorta və bir təkrarsığorta şirkəti var. Azərbaycan Maliyyə Nazirliyinin məlumatlarına əsasən, yanvar - sentyabrda sığorta şirkətlərinin topladıqları sığorta haqları 148,7 mln. manat, ödənişləri 40,4 mln. manat təşkil edib.
Noyabrın 4 - nə olan cari mübadilə məzənnəsi -- 0,8097AZN/USD.
Müəlliflə əlaqə saxlamaq üçün elektron ünvan: [email protected]