Azərbaycan, Bakı, 05 noyabr/ Trend , müxbir Ü.İsmayılova/ "Bu gün dünya maliyyə böhranı Azərbaycanın kənd təsərrüfatına təsir göstərməyib", - kənd təsərrüfatı naziri İsmət Abbasov çərşənbə günü telefonla Trend -a bildirib.
"Hazırda Azərbaycan kənar asılılığın maksimal azaldılması tədbirləri həyata keçirir. Ölkə hökuməti bununla əlaqədar hər il fermerlər üçün subsidiya və güzəştlər ayırır", - Abbasov bildirib.
Nazirin sözlərinə görə, hökumət Azərbaycan fermerlərinin 2008-ci ildə aldıqları bütün subsidiya və güzəştləri saxlamaqla, 2009-cu ildə də ölkənin aqrar sektoruna subsidiyaların ayrılmasını davam etdirmək niyyətindədir
Azərbaycan prezidenti İlham Əliyev 2007-ci ildə Azərbaycanda kənd təsərrüfatının inkişaf etdirilməsi üçün "Kənd təsərrüfatı məhsulları istehsalçılarına dövlət dəstəyi haqqında" sərəncam verib. Enerji daşıyıcılarının tarifləri artırıldıqdan sonra, dövlət büdcəsindən 80 mln. manat ayrılıb. Bu vəsaitin 56 mln. manatı yanacaq-sürtkü yağlarının alınmasına, 24 mln. manatı isə gübrələrin dəyərinin 50 faizinin ödənilməsinə yönəldilib.
Bundan əlavə, hər hektar üçün 40 manat, hər 300 kiloqram mineral gübrə üçün 26 manat nəzərdə tutulub ki, bu da təxminən 900 min ha səpin sahəsini becərməyə imkan verir.
Azərbaycanın Nazirlər Kabineti 2007-ci ilin noyabrında taxıl istehsalçılarına hər ha səpin sahəsinə görə 40 manat məbləğində subsidiyaların verilməsi haqqında sərəncam verib. Bu sərəncam taxıl istehsalının stimullaşdırılması, istehsalçıların maddi marağının yüksəldilməsi və daxildə taxıl istehsalı hesabına çörək və un məmulatlarına tələbatın ödənilməsinə yönəlib.
2008 - ci ilin avqustunda prezidentin kənd təsərrüfatı məhsulları istehsalçılarına əlavə yardımın verilməsi haqqında sərəncamına əsasən, dövlət başçısının Ehtiyat Fondundan Agrolizing ASC-yə bu tədbirlərin realizəsi üçün 25 mln. manat ayrılıb. Ayrılmış vəsaitlər hesabına taxıl istehsalçıları üçün buğda toxumlarının dəyərinin 50 faizinin və mineral gübrələrin dəyərinin 70 faizinin örtülməsi nəzərdə tutulur.
Noyabrın 5-nə olan cari mübadilə məzənnəsi -- 0,8078 AZN/USD.
Müəlliflə əlaqə saxlamaq üçün elektron ünvan: [email protected]
