Azərbaycan, Bakı, 11 noyabr/ Trend , müxbir İ.Xəlilova/ "Azərbaycanın bank sektorunun likvidliyini təmin etmək üçün ilk dəfə olaraq 2009-cu ilin dövlət büdcəsində bankların Nizamnamə kapitalına yatırılacaq 50 mln. manatın ayrılması nəzərdə tutulur", - Hesablama Palatasının sədri Heydər Əsədov çərşənbə axşamı Milli Məclisin 2009 - cu ilin dövlət büdcəsi layihəsinin müzakirəsi üzrə plenar iclasında bildirib.
Bu gün ölkədə yeganə dövlət bankı Azərbaycan Beynəlxalq Bankıdır. Bankın 50,2 faizi dövlətə məxsusdur. Lakin maliyyə nazirinin müavini Azər Bayramov Trend - a bildirib ki, büdcədə ayrılmış vəsaitlər bütün bank sektoru üçün nəzərdə tutulub.
"Bankların seçilməsi meyarları hələ hazırlanmayıb. Bu gün Azərbaycan Milli Bankı ilə bu məsələ üzərində birgə iş aparılır", - Bayramov bildirib.
Azərbaycanda ümumilikdə 45 bank fəaliyyət göstərir, onlardan 23-də xarici kapital iştirak edir.
"Dövlət büdcəsində səhmdar cəmiyyətlərin kapitallarına vəsaitlərin yatırılması vasitəsilə iqtisadiyyatda likvidliyin tənzimlənməsi üçün 20 mln. manat məbləğində vəsait ayrılıb", - Hesablama Palatasının rəhbəri bildirib.