Azərbaycan, Bakı, 12 noyabr/ Trend , müxbir N.İsmayılova/ "Dünya maliyyə böhranı nə Bank Melli Iran-ın İrandakı baş ofisinin, nə də Bakı filialının fəaliyyətinə təsir göstərib" - Bankın Azərbaycan filialının sədr müavini Anar İbrahimov bildirib.
"Bankın likvidlik qabiliyyəti hazırda normadan yuxarıdır. Bu, vəsaitlərimizin yüksək səviyyəsilə bağlıdır. Biz hər an hər bir müştərimiz qarşısında öhdəliklərimizi həyata keçirə bilərik" - İbrahimov deyib.
O, Azərbaycan Milli Bankının ehtiyat fondla bağlı tələbləri (bank öhdəliklərinə görə, həm milli, həm də əcnəbi valyutanın məcburi rezervləşmə norması 12 faizdən 9 faizədək, xarici öhdəliklərə görə məcburi rezervləşmə norması beş faizdən sıfır faizədək azaldılıb) və hesabaalma tariflərini 10 faizədək azaldandan sonra, Bakı filialının kapitalının 11,28 manatadək artdığını təsdiq edib.
"Bir çox aparıcı banklarda Avropa fondlarından cəlb olunan vəsaitlər var. Nəzəri baxımdan, bu, onların fəaliyyətinə - ən azı, aktivlərin azalmasına təsir göstərməlidir" - İbrahimov vurğulayıb: "Onlar kreditləşməni dayandıra biliblər, prinsipcə, bir çox banklarda bu baş verib. Onların digər qurumlar və mühüm müştərilər qarşısında öhdəliklərini həyata keçirməklə bağlı çətinlik hiss edəcəkləri istisna deyil. Bu zaman həmin vəsaitlər Avropaya geri axacaq".
İbrahimovun fikrincə, böhran hazırda heç bir Azərbaycan bankına ciddi şəkildə təsir göstərməyib.
Bakıda Bank Melli Iran yalnız bir filialla təmsil olunur, amma bütün dünyada onun geniş filial şəbəkəsi mövcuddur.
Cari ilin oktyabrın sonlarınadək bankın aktivləri - 18,51 milyon manat, Nizamnamə kapitalı - 10 milyon, ümumi kapital - 11,28 milyon, bankın kredit portfeli - 6,37 milyon, depozit portfeli - 2,36 manat təşkil edib. Bu ilin on ayı ərzində bankın gəliri 1,15 milyon manat olub.
Noyabrın 12- nə olan rəsmi məzənnə 0,8085AZN/USD.
Məqalə müəllifilə əlaqə ünvanı: [email protected]
