Azərbaycan, Bakı, 17 noyabr/ Trend , müxbir Ü.İsmayılova/ "Azərbaycanın MBASK Sığorta Şirkəti girov qoyulmuş avtomobil vasitələrinin sığortalanmasından ödənişlərin həcminin azalması nəticəsində mənfəətin azalması ilə əlaqədar, 2009-cu ilin antiböhran planını hazırlayır", - şirkətin İdarə Heyətinin sədri Cəmil Məlikov bazar ertəsi bildirib.
"Antiböhran planı inzibati xərclərin maksimal azaldılmasını və hətta personalın ixtisarını nəzərdə tutur", - Məlikov bildirib.
Onun sözlərinə görə, gələn il şirkət sərmayə layihələrinin realizəsinə çəkiləcək xərcləri də azaltmaq niyyətindədir. MBASK ,əsasən, stajçıları və bir müddət əvvəl işə qəbul edilənləri işdən azad edəcək. Buna baxmayaraq, şirkət agentlərin yığımını davam etdirmək niyyətindədir.
"Girov qoyulmuş avtomobil vasitələrinin sığortasından əldə edilən sığorta haqlarının azalması nəticəsində, bazarda sığortanın bu növü üzrə daxilolmaların həcmi ümumilikdə 15 faiz azalacaq", - Məlikov bildirib.
Azərbaycanın sığorta bazarında inkişaf etmiş sığorta növlərindən biri girov avtomobilin sığortalanmasıdır. Azərbaycan Maliyyə Nazirliyinin məlumatlarına əsasən, yanvar-sentyabrda avtosığorta üzrə sığorta haqları 48,2 mln. manat (91,8 faiz artımla) təşkil edib, ödənişlər 14,6 mln. manata (iki dəfə artım) bərabər olub. Mövcud 28 sığorta şirkətinin sığorta haqlarının ümumi həcmi 148,7 mln. manat, ödənişləri 40,4 mln. manat təşkil edib.
Azərbaycan Milli Bankı (AMB) ölkənin bank sektoruna nəzarəti gücləndirmək və avtomobil alqısı üçün kreditlərin verilməsi şərtlərini sərtləşdirmək barədə göstəriş verib, - bir müddət əvvəl bank dairələrindəki mənbələrdən məlum olub. Avtomobil alqısının kreditləşdirmə həcminin azalması bununla izah edilir. Öz növbəsində bu, sığorta şirkətlərinin biznesinə təsir göstərir. Milli Bankın tələblərindən biri də, alıcının ödədiyi ilkin ödənişin məbləğinin hazırki 20 faizdən artırılması ilə, kreditlərin verilmə müddətini beş ildən üç ilədək azaltmaq olub. Uçot dərəcəsinin 10 faizədək azaldılması ilə əlaqədar olaraq, Milli Bank avtomobil kreditləri üzrə faiz dərəcələrinin 15 faizədək azaldılmasının lehinə çıxış edir.
Azərbaycanın sığorta bazarında 1992-ci ildən fəaliyyət göstərən MBASK SŞ 29 növ sığorta xidməti göstərir ki, onlardan 4-ü məcburidir. Şirkətin Nizamnamə kapitalı 2 mln. manatdır. 2005 - ci ilin yanvarından etibarən MBASK-ın səhmlərinin 30 faizi Avropa Yenidənqurma və İnkişaf Bankına məxsusdur.
Noyabrın 17- nə olan cari mübadilə məzənnəsi - 0,8093AZN/USD.
Müəlliflə əlaqə saxlamaq üçün elektron ünvan: [email protected]
