Azərbaycan, Bakı, 25 noyabr/ Trend , müxbir İ.Xəlilova/ Dünya maliyyə böhranı Azərbaycanın bank bazarında yeni bankların yaradılmasına marağı azaltmayıb, - Azərbaycan Milli Bankının Kredit Təşkilatlarının Fəaliyyətinə Nəzarət Departamentinin direktoru Rəşad Orucov çərşənbə axşamı bildirib.
Orucovun sözlərinə görə, Rusiyanın Vneştorqbankının (VTB Bank) Azərbaycanın AF Bank-ında səhm nəzarət paketinin alınması üzrə müraciətindən başqa, AMB-yə iki yeni bankın - Pal Bank və AZFİNANSBANK-ın açılmasına dair daha iki ərizə daxil olub.
Rusiya bankının Azərbaycanın işğal edilmiş ərazilərində bank əməliyyatlarının dayandırılması üzrə götürdüyü öhdəliklər əsasında, VTB Bank- a artıq AF Bank- a daxil olmaq üçün icazə verilib. Orucovun bildirdiyinə görə, VTB Xankəndidə VTB Armenia törəmə bankının filialının bağlanılması haqqında rəsmi sənədlər təqdim edib.
Pal Bank-ın səhmdarlarının qərarına toxunan Milli Bankın nümayəndəsi qeyd edib ki, onlar öz istəkləri ilə bankı bağlamaq qərarına gəliblər və AMB - yə müraciətlərini geri çağırıblar.
Orucovun sözlərinə görə, bu gün yalnız AZFİNANSBANK-ın yaradılması üzrə yeganə müraciət AMB - nin müzakirəsindədir və yaxın vaxtlarda bu məsələ üzrə qərar qəbul ediləcək. Yeni bank 10 mln. manat Nizamnamə kapitalı ilə yaradılır. Bankın hüquqi ünvanı: AZ1073, Bakı, Yasamal rayonu, İsmayılbəy Qutqaşınlı küç., ev. 112. AZFİNANSBANK-ın səhmdarları hələ açıqlanmır.
Bu il daha bir bank - Nizamnamə kapitalı 10 mln. manat olan "Naxçıvanbank" ASC də lisenziya alıb.
Yeni bankların daxil olması ilə yanaşı, rəqabətə dözməyən və bank qanunvericiliyinin tələblərinə, AMB - nin prudensial normalarına riayət etməyən 10 ildən artıq fəaliyyət göstərən banklar ölkənin bank bazarını tərk edirlər. Milli Bankın İdarə Heyəti iyulun əvvəlində Atlantbank və Poctbank ASC- dən bank fəaliyyətinin həyata keçirilməsinə dair lisenziyanın geri çağırılması barədə qərar qəbul edib. Hazırda ölkənin bank bazarında 45 bank fəaliyyət göstərir.
Bu tədbirlər ölkənin bank sistmeinin restrukturlaşdırılması, maliyyə sabitliyinin təmin edilməsi və maliyyə vasitəçiliyinin səmərəsinin artırılması çərçivəsində həyata keçirilir.
Noyabrın 25 - nə olan cari mübadilə məzənnəsi -- 0,8079 AZN/USD.
Müəlliflə əlaqə saxlamaq üçün elektron ünvan: [email protected]
