Özbəkistan, Daşkənd, 05 dekabr/ Trend , müxbir T.Jukov/ Özbəkistan Senatı 2009-cu ilin dövlət büdcəsini 491,6 mlrd. sum (təxminən 361,2 mln. dollar) kəsirlə təsdiq edib, - Trend -ın Daşkənddəki xüsusi müxbiri xəbər verir.
Gələn il Özbəkistanın dövlət büdcəsinin kəsiri proqnozlaşdırılan ÜDM həcminin 1 faizini təşkil edəcək, - Senatın mətbuat xidmətindən Trend -a bildirilib. 2009-cu ildə dövlət büdcəsinin mədaxil hissəsi 10,421 trln. özbək sumu (7,628 mlrd. dollardan çox) təşkil edəcək ki, bu da ÜDM-in 21,2 faizinə bərabərdir. Təsdiq edilmiş büdcəyə əsasən, məxaric hissəsi 10,913 trln. sum (7,989 mlrd. dollar) və ya ÜDM-in 22,2 faizi həcmində planlaşdırılıb.
"Dövlət büdcəsinin kəsiri 2009-cu ilin əvvəlinə olan vəziyyətə görə, respublika büdcəsindəki sərbəst vəsait qalıqları hesabına qapadılacaq", - Baş nazirin birinci müavini, maliyyə naziri Rüstəm Əzimov Senatın iclasında bildirib.
Onun sözlərinə görə, dövlət büdcəsinin parametrləri ÜDM-in 2008-ci ilə planlaşdırılan 8 faiz, sənaye istehsalının 9,3 faiz, kənd təsərrüfatı istehsalının 5 faiz, kapital yatırımlarının 18 faiz, inflyasiyanın 6,8 faiz səviyyəsində artımı nəzərə alınmaqla hazırlanıb.
2009-cu ildə xərclərin 56,5 faizini sosial sahənin - səhiyyə, maarifləndirmə, mədəniyyət, idman və əhalinin sosial müdafiəsinin inkişafına yönəltmək planlaşdırılır.
"2009-cu ilin dövlət büdcəsi gəlirlərin artırılması və vergilərin azaldılması yolu ilə əhalinin həyat səviyyəsinin gələcək yüksəlişinə yönəldilib, - Senatın büdcə məsələləri və iqtisadi islahatlar komitəsinin üzvü Gülsənəm Şokarimova Trend -a bildirib. - Yeni ildən fiziki şəxslərin gəlirlərinə vergi dərəcələri azaldılacaq".
Mövcud şkala üzrə altı minimal əmək haqqı məbləğində gəlirlərdən 13 faiz dərəcə, 6-dan 10-dək 18 faiz, 10-dan yüksək isə - 25 faiz dərəcə üzrə vergi alınırdı. 2009-cu il yanvarın 1-dən başlayaraq, gəlir vergisinin bu dərəcələri müvafiq olaraq 12, 17 və 22 faiz təşkil edəcək.
Mətbuat xidmətinin məlumatına görə, mövucd ƏDV dərəcəsini saxlamaqla, beynəlxalq yük daşınmaları və ixraca göndərilən pambıq lifinə bu vergini sıfır dərəcə səviyyəsində tətbiq etmək nəzərdə tutulub.
Müəlliflə əlaqə saxlamaq üçün elektron ünvan: [email protected]
