Azərbaycan, Bakı, 09 yanvar/ Trend , müxbir Ü.İsmayılova/ "Azərbaycanın Sığortaçılar Assosiasiyası (ASA) 2008 - ci ildə fəaliyyətinin nəticələrinin müzakirəsi və cari ildə strateji iş planının təsdiq edilməsi üşün növbəti ümumi toplantının keçirilməsini planlaşdırır", - Assosiasiyanın İdarə Heyətinin sədri, MBASK Sığorta Şirkəti İdarə Heyətinin sədri Cəmil Məlikov cümə günü bildirib.
"İclas yanvarın sonu - fevralın əvvəlində keçiriləcək", - Məlikov dəqiqləşdirib.
2008 - ci ildə ASA fəaliyyətini aktivləşdirib. İl ərzində I Azərbaycan Beynəlxalq Sığorta Forumu keçirilib. Forumda əksər beynəlxalq sığorta və təkrarsığorta şirkətlərinin nümayəndələri iştirak ediblər. Bundan başqa, sığorta məktəbi yaradılıb və Assosiasiya bu məktəb çərçivəsində, beynəlxalq səviyyədə tanınan sertifikatlar almış aktuarilər üçün treninqlər keçirib.
2009 - cu ilin fəaliyyət planı çərçivəsində, ASA - nın təhsil komitəsi tərəfindən sığorta şirkətlərinin top - menecmenti və əməkdaşları üçün treninqlərin keçirilməsi, ASA-nın komitələrinin iclaslarının hazırlanması və təşkilati - texniki təminatı, sığorta üzrə İnternet - portalın işə salınması, sığorta üzrə elektron kitabxananın yaradılması (ədəbiyyatın Azərbaycan dilinə tərcüməsi) gözlənilir, - Assosiasiyanın icraçı direktoru Qafar Məcidov əvvəllər bildirib.
Cari ildə üzvlük haqlarının daxil olmasına nəzarət gücləndiriləcək. Bundan başqa, ASA - nın üzvlərinə Assosiasiyanın fəaliyyət istiqamətləri üzrə informasiya xarakterli və digər materiallar göndəriləcək.
Tədbirlər planına sığorta sahəsində problemlərin aşkar edilməsi məqsədilə sorğuların aparılması; sığorta təşkilatları ilə ASA-ya üzvlük, digər QHT ilə birgə əməkdaşlıq məsələləri üzrə iş; xarici sığortaçılar və onların milli və beynəlxalq birlikləri ilə münasibətlərin, işgüzar əlaqələrin inkişaf etdirilməsi; informasiya təsiri və Rusiya, Ukraynanın sığorta Assosiasiyaları və Almaniya Sığortaçılar Assosiasiyası ilə birgə layihələrin realizəsi daxildir.
2009 - cu ildə II Azərbaycan Beynəlxalq Sığorta Forumu da keçiriləcək.
I Azərbaycan Beynəlxalq Sığorta Forumu iyulda Bakıda keçirilib. Bu tədbir Azərbaycanın sığorta bazarının inkişaf tendensiyalarına, Avropa ölkələrinin sığorta bazarının təcrübəsinin Azərbaycada sığorta sektorunun inkişafına təsirinə, həyat sığortasının inkişafına, Azərbaycanın sığorta bazarının ölkənin maliyyə sistemi kimi təhlilinə və sığortada korporativ idarəetməyə həsr edilmişdi.
Azərbaycanın Sığortaçılar Assosiasiyası ölkədə fəaliyyət göstərən bütün sığorta şirkətlərinin iştirakı ilə 2006 - cı ilin dekabrında təsis edilib.
Müəlliflə əlaqə saxlamaq üçün elektron ünvan: [email protected]
