Azərbaycan, Bakı, 02 fevrla/ Trend , müxbir A.Bədəlova/
Britaniyanın iqtisadi araşdırmalar üzrə Capital Economics konsaltinq şirkəti 2009-cu ildə avronun məzənnəsinin 1,1 dollaradək düşəcəyini proqnozlaşdırır.
"Çox ehtimal ki, Avropa valyutasına dəstək göstərən amillər yaxın aylarda zəifləyəcək", - Britaniya şirkətinin analitiklərinin məruzəsində deyilir.
Avronun dollara nisbətdə məzənnəsi son iki ayda ən aşağı səviyyəyədək azalıb. Londonda səhər sessiyası zamanı avro/dollar cütlüyü 1.2711 dollar səviyyəsinə çatıb ki, bu da dekabrın əvvəlindən minimal göstəricidir.
Britaniya şirkətinin proqnozlarına görə, 2010-cu ildə avronun Amerika valyutasına nisbətdə məzənnəsi 1,1 dollar səviyyəsində qalacaq.
Capital Economics-in analitiklərinin gözləmələrinə görə, cari və gələn ildə Avrozonada iqtisadiyyatın artım templəri Birləşmiş Krallığın artım templərindən yüksək olsa da, 2010-cu ildə ABŞ-ın iqtisadi artımından aşağı olacaq.
ABŞ Ticarət Nazirliyinin ötən həftə dərc etdiyi ilkin məlumatlara əsasən, 2008-ci ilin dördüncü rübündə ölkənin ÜDM-i 3,8 faiz azalıb ki, bu da 1982-ci ildən ən pis göstəricidir. Ötən il ərzində ABŞ-da ÜDM-in artımı 1,3 faiz təşkil edib.
Şirkətin proqnozlarına görə, 2009-cu ildə Avrozonanın ÜDM-i 2 faiz, 2010-cu ildə 0,5 faiz azalacaq. Cari ildə Avrozonada işsizlik 9,7 faiz, 2010-cu ildə 11 faiz səviyyəsində proqnozlaşdırılır. 2009-cu ildə inflyasiyanın səviyyəsi 0,5 faiz, 2010-cu ildə 1,3 faiz olacaq.
Müəlliflə əlaqə saxlamaq üçün elektron ünvan: [email protected]
