Azərbaycan, Bakı, 03 mart / Trend , müxbir S.Babayeva / "Aqrolizinq" ASC 2009-cu ildə aqrokimya maddələri partiyası almaq niyyətindədir. ASC-dən verilən məlumata görə, tender yolu ilə 30 min ton nitrat ammoniyası və beş min ton nitroamofoska 16:16:16 alınacaq.
Tenderdə iştirak dəyəri min manatdır.
Tenderdə iştirak etmək üçün iddiaçılar 2009-cu il 10 aprel tarixinədək öz sənədlərini (Tender təklifləri və tender təklifləri dəyərinin 2 faizi həcmində bank zəmanətindən savayı), 20 aprel tarixinədək isə təkliflərini təqdim etməlidirlər.
Tenderdə qalib gələn iddiaçılar DDP şərtləri əsasında müqavilənin imzalandığı gündən 90 gün ərzində kimyəvi maddələri Aqrolizinq ASC-yə təqdim etməlidirlər.
İddiaçıların təklifləri iddiaçılar və ya onların Aqrolizinq ASC-dəki nümayəndələrinin iştirakı ilə 2009-cu il 21 aprel tarixində açılacaq.
"Aqrolizinq" ASC Kənd Təsərrüfatı Nazirliyinin balansında yaradılıb. Müəssisənin fəaliyyəti aqrar sahənin yaxşılaşdırılması və müxtəlif kənd təsərrüfatı texnikasının əldə edilməsi və yerli torpaq sahiblərinə lizinq verilməsi yolu ilə ölkədə sahibkarlığa dəstəkdən ibarətdir. Bu gün ASC doqquz regional aqroservis təchizat bazasına və işğal olunmuş ərazilər istisna olmaqla Azərbaycanın bütün rayonlarında 55 aqroservis filialına malikdir.
2005-ci ildən 2008-ci ilədək "Aqrolizinq" dövlət büdcəsindən 133 mln. manat vəsait alıb. Bu məbləğin 76,6 milyonu kənd təsərrüfatı texnikası, 7,4 milyonu texniki avadanlıq və 4,9 milyonu pestisid və gübrənin alınmasına sərf olunub.
Bu dövr ərzində 500-dən artıq taxılyığan maşın, 1,5 min traktor, 30 mini-traktor, 120 ekskavator, dörd mindən çox müxtəlif kənd təsərrüfatı texnikası alınıb.
2009-cu ilin dövlət büdcəsindən "Aqrolizinq" ASC üçün əvvəlki illərdə olduğu kimi 37,5 mln. manat ayrılacaq.
Məqalə müəllifi ilə əlaqə ünvanı: [email protected]
