Azərbaycan, Bakı, 06 may / Trend , müxbir Ü.İsmayılova /
Beynəlxalq Maliyyə Korporasiyası Azərbaycan və Mərkəzi Asiyada əmlak maliyyələşdirilməsi layihəsi çərçivəsində daşınmaz əmlak bazarının dünya standartlarına uyğun analitik təhlilinin aparılması üzrə kursun keçirilməsi üçün məsləhətçi cəlb edib. Bu barədə "MBA Group" Konsaltinq Şirkətinin baş direktoru Nüsrət İbrahimov bildirib.
"Belə bir kursun keçirilməsində əsas məqsəd Azərbaycanın daşınmaz əmlak bazarının dünya standartlarına uyğun təhlilinin həyata keçirilməsidir", - deyə İbrahimov əlavə edib.
Bu gün başlayan və həftənin sonunadək davam edəcək təhsil kursunu "Rusiya Rieltorlar Gildiyası"nın baş analitiki, Rusiyanın Q.V.Plexanov adına İqtisadiyyat Akademiyasının professoru Gennadi Sternik aparır.
Tədbir BMK-nın texniki yardım layihəsinin II fazası çərçivəsində keçirilir. Layihə İsveçrənin İqtisadi Əlaqələr üzrə Dövlət Katibliyi (State Secretariat for Economic Affairs - SECO) ilə birgə Maliyyə Korporasiyası tərəfindən maliyyələşdirilir. Baxmayaraq ki, layihə regionaldır və Mərkəzi Asiya və Azərbaycanı əhatə edir, SECO-nun vəsaitləri yalnız Azərbaycan üçün nəzərdə tutulub.
Məqalə müəllifi ilə əlaqə ünvanı: [email protected]
