Azərbaycan, Bakı, 06 may / Trend , müxbir A.Bədəlova /
Kapital Bank kartların şəxsi prosessinq mərkəzinə miqrasiyasını tam olaraq başa vurub. Bu barədə çərşənbə günü bankın idarə heyətinin sədri Rauf Rzayev deyib. Bu günədək Kapital Bank 2,212 milyon kart buraxıb ki, bunlardan 1,808 milyonu aktiv kartlardır.
"Sözügedən proses mayın 5-də başlayıb və sona çatıb. Hazırda Kapital Bank prosessinqi vasitəsi ilə kartlarla əməliyyatlar aparılır. Lakin bankomatlar hələ tam olaraq mərkəzə qoşulmayıblar", - Rzayev qeyd edib.
Respublika üzrə Kapital Bank-ın 320 bankomatı var ki, bunun 249-u bankın şəxsi prosessinqi üzrə xidmətə keçiblər. Hazırda mərkəzə qoşulan bankomatların 112-si işləyir. Bununla yanaşı, prosessinq mərkəzinə 94 POS-terminal qoşulub.
Mərkəzin işə salınmasında ləngimələr onun Visa International və MasterCard beynəlxalq ödəniş sistemlərində sertifikasiyası ilə bağlı idi.
Əvvəllər prosessinq mərkəzinin tətbiqini ötən ilin iyul ayında başa çatdırmaq nəzərdə tutulmuşdu. Kapital Bank-da prosessinq mərkəzinin yaradılması "Kompas" şirkəti tərəfindən həyata keçirilib.
Layihənin qiyməti 1,29 milyon avro təşkil edir. Layihənin reallaşması bankın şəxsi vəsaiti hesabına həyata keçirilib.
İlkin mərhələdə prosessinq Kapital Bank kartlarına xidmət göstərməyi nəzərdə tutsa da, gələcəkdə digər bank kartlarının istifadəsinə şərait yaradılacaq.
Funksionallıq baxımından yeni mərkəz Azərbaycanda fəaliyyət göstərən prosessinq mərkəzlərindən iki dəfə artıq imkana malik olacaq (Azərbaycanda iki "Azərikard" prosessinq mərkəzi fəaliyyət göstərir, Azərbaycan Beynəlxalq Bankıdır. Mayın 5-dək Kapital Bank və "Millikart"a "Azərikard" tərəfindən xidmət göstərilib).
Kapital Bank-ın prosessinq mərkəzinin buraxılış imkanları 2,5 milyon kart təşkil edəcək. Mərkəz 550 bankomata, 200 məlumat köşkünə və 5 min POS-terminala xidmət göstərəcək.
Mayın 06-na olan rəsmi məzənnə 0,8036 AZN/USD təşkil edir.
Məqalə müəllifi ilə əlaqə ünvanı: [email protected]
