Azərbaycan, Bakı, 12 may / Trend , müxbir Ü.İsmayılova /
2009-cu ilin birinci rübü ərzində Azərbaycan Respublikası Dövlət Sosial Müdafiə Fondunun mərkəzi aparatının beynəlxalq əlaqələr sektoruna xarici ölkələrin sığorta-pensiya qurumları, əcnəbi vətəndaşlar və xaricdə yaşayan Azərbaycan Respublikası vətəndaşları tərəfindən 288 müraciət daxil olub. Bu barədə fondun məlumatında deyilir.
Müraciətlərin çoxu (254) MDB ölkələrindən daxil olub. Bu müraciətlərin mövzusu vətəndaşların pensiya hüququnun təmin edilməsi ilə bağlı zəruri hesab olunan müvafiq rəsmi sənədlərin hazırlanaraq təqdim olunması, konkret hallar üçün zəruri ikitərəfli münasibətlərin tənzimlənməsindən ibarət olub.
Müraciətlərin sayına görə növbəti yerdə isə Türkiyədir. Türkiyədən fonda 88 müraciət ünvanlanıb. Bu müraciətlərin mövzusu Türkiyə və Azərbaycan respublikaları arasında sosial müdafiə sahəsində ikitərəfli sazişə uyğun olaraq vətəndaşların sosial sığorta və pensiya hüquqlarının gerçəkləşdirilməsi məqsədi ilə konkret tədbirlərin görülməsidir.
Məqalə müəllifi ilə əlaqə ünvanı: [email protected]