Azərbaycan, Gəncə, 15 may / Trend , müxbir V.Məmmədov /
Azərbaycanda bir il müddətinə uzadılma şərti ilə 2007-ci ildə tətbiq edilən taxıl idxalının əlavə dəyər vergisindən (ƏDV) azad edilməsi qərarının ləğv edilməsi taxılın qiymətinin artmasına səbəb olmayacaq. Bu barədə Azərbaycanın kənd təsərrüfatı naziri İsmət Abbasov bildirib. ƏDV-dən azadedilmə 2007-ci ildə tətbiq edilmişdi və bu, çörək istehsalçılarına taxılın hər tonunu 50 dollar ucuz almaq imkanı verirdi.
"Taxıl idxalının ƏDV-dən azad edilməsi qərarının ləğv edilməsinədək ölkəyə kifayət qədər həcmdə taxıl gətirilib. Bundan əlavə ötən ilki məhsuldan daxili ehtiyatlar qalıb. Bu, qiymətlərin qalxmasına imkan verməyəcək", - deyə Abbasov Gəncədə keçirilən "Kənd təsərrüfatı sahəsində mütəxəssislərin hazırlanması problemi: Müasir vəziyyət, beynəlxalq təcrübə və yeni aqrar təhsil modeli" adlı beynəlxalq konfransda çıxışı zamanı bildirib.
Onun sözlərinə görə, 2008-ci ildə buğda əkini sahələrinin 800 min hektar artırılması nəticəsində bu il 2,160 mln. ton həcmində buğda məhsulu gözlənilir.
Nazir hesab edir ki, taxıl idxalının ƏDV-dən azad edilməsi qərarının ləğv edilməsi yerli taxıl istehsalının artmasına imkan yaradacaq.
"Yaxın gələcəkdə hətta biz taxıl ixrac edə bilərik", - deyə Abbasov bildirib.
Məqalə müəllifi ilə əlaqə ünvanı: [email protected]