Azərbaycan, Bakı, 12 iyun / Trend , müxbir S.Babayeva /
İyunun 1-dən etibarən donuzçuluq təsərrüfatlarında А/H1N1 virusunun (donuz qripi) aşkar edilməsi üzrə monitorinqlər ölkə ərazisində virus aşkar etməyib. Bu barədə Azərbaycanın Kənd Təsərrüfatı Nazirliyi yanında Dövlət Baytarlıq Xidmətinin mətbuat xidməti rəhbəri Yolçu Xanvəli cümə günü bildirilib.
"Donuzlardan götürülmüş 343 qan nümunəsi üzrə laborator tədqiqatlar keçirilib və onların heç birində virus daşıyıcıları aşkar olunmayıb", - deyə Xanvəli bildirib.
Onun sözlərinə əsasən, donuzçuluq təsərrüfatının olduğu bütün rayonlar üzrə monitorinqlər keçirilir. Mayın əvvələrində keçirilmiş əvvəlki monitorinq nəticəsində də Azərbaycan ərazisində virus aşkar olunmayıb.
Azərbaycanda Amerika və Avropa qitəsindən heyvandarlıq məhsullarının gətirilməsinə qoyulan müvəqqəti qadağa hələ də qüvvədədir.
"Donuz qripi" üzrə profilaktik tədbirlər məqsədilə ölkədəki bütün donuzçuluq təsərrüfatları qapalı məkanlara köçürülüb, regionun baytarlıq idarələrində iş gücləndirilib. Vəziyyətə nəzarət bu idarələrin başçılarına tapşırılıb.
Ölkədə donuzçuluq təsərrüfatları Qəbələ, Zaqatala, Şəki, Balakən, həmçinin Gəncə və Bakı ətrafında mövcuddur.
Məqalə müəllifi ilə əlaqə ünvanı: [email protected]