Azərbaycan, Bakı, 16 iyun / Trend , müxbir N.İsmayılova /
2009-cu ilin 5 ayının yekunlarına görə, Azərbaycanda orta aylıq əmək haqqının məbləği 296,5 manat təşkil edib ki, bu da ötən ilin anoloji dövrünün göstəricisindən 22,2 faiz artıqdır, çərşənbə axşamı Dövlət Statistika Komitəsindən bildiriblər.
Ən yüksək məvacib hasilat sənayesində, maliyyə fəaliyyəti sferasında, əmlak əməliyyatları, icarə və istehlakçılara xidmətlərin göstərilməsi, tikinti sektorunda qeydə alınıb.
Müəssisələrin və təşkilatların əməkdaşları sosial əhəmiyyətli 4,4 milyon manat məbləğində yardım alıblar. Bu yardımlar əsasən hasilat sənayesi, enerji istehsalı və paylanması üzrə müəssisələr, qaz və su, emaledici sənaye, nəqliyyat və rabitə sahəsində çalışan işçilərə verilib.
Hesabat dövründə orta aylıq əmək haqqı adambaşına düşən orta pul gəlirlərindən ay ərzində 36,4 faiz artıq olub.
Yanvar-mayda adambaşına düşən nominal gəlir 994,8 manat təşkil edib ki, bu göstərici ötən ilin anoloji dövrünə nisbətdə 17,1 faiz artıqdır. Adambaşına düşən real pul gəlirləri 17,7 faiz artımla 890,4 manat təşkil edib.
5 ayın yekunlarına görə Azərbaycan əhalisinin nominal gəlirləri 8584,2 milyon manat təşkil edib və bu ötən ilin göstəricisindən 18,5 faiz artıqdır. Bu dövr ərzində əhalinin real pul gəlirləri 19,1 faiz artımla 7686,6 milyon manata çatıb.
Hesabat dövründə əhali məhsulların əldə olunmasına şəxsi gəlirlərin 67,2 faizini, vergilərin ödənməsi, sosial sığorta və icbari üzvlük ödənişləri üçün 10,5 faizini, yığım və kapitalın artırılması üçün 22,3 faizini yönəldib.
İyunun 16-na olan rəsmi məzənnə 0,8039 AZN/USD təşkil edir.
Məqalə müəllifi ilə əlaqə ünvanı: [email protected]