Azərbaycan, Bakı, 30 iyun / Trend , müxbir İ.Xəlilova /
Başak İnam müştərək sığorta şirkəti 2009-cu ildə sığorta haqları yığımı üzrə 5%-lik artım gözləyir, bu barədə Başak İnam-ın baş direktoru Orxan Həsənov bildirib.
"Haqların yığımının kiçik həcmi ölkənin sığorta bazarında 15-20 faizlik azalma ilə əlaqədardır. Məqsədimiz 5 faizlik artıma və ya 2008-ci ildəki yığım səviyyəsinin saxlanılmasına nail olmaqdır", - deyə Həsənov bildirib.
Onun qeyd etdiyi kimi, ötən ilin yekunlarına əsasən, 3,2 milyon manat həcmində haqq yığılıb, 2009-cu ilin birinci yarımilində şirkətin haqları 1,5 milyon manat təşkil edib. Onun fikrincə, bu, beş faizlik artıma imkan yaradır.
Bu il ödəmələrin həcmində azalma müşahidə edilir. Ötən ilin analoji dövründə Başak İnam-ın ödəmələri haqların 40 faizi səviyyəsində həyata keçirilirdisə, hazırda bu göstərici 37 faiz təşkil edir.
Başak İnam 1996-cı ildə Türkiyənin Başak şirkətinin səhmlərin 49%-i ilə təsis edilib. Başak İnam müştərək sığorta şirkətidir. Səhmdarları sırasına Fransanın Groupma investisiya korporasiyası daxildir. O, 2006-cı ildə Türkiyənin Başak Sığorta şirkətinin kapitalının 60 faiz səhmlərinə sahib olaraq şirkətin səhmdarına çevrilib.
İyunun 30-na olan rəsmi məzənnə 0,8041 AZN/USD təşkil edir.
Məqalə müəllifi ilə əlaqə ünvanı: [email protected]