Bakı, Azərbaycan, 15 iyul / Trend , müxbir Ü.İsmayılova /
Azərbaycanın böyük lizinq şirkətlərindən biri ATA Lizinq ilin sonuna kimi portfelini hazırki 4,5 milyon manatdan altı milyon manata kimi çatdırmağı planlaşdırır, bu barədə çərşənbə günü şirkətin idarəetmə heyətinin sədri Yusif Müslimov ATA Lizinq-in yaranmasının beş illiyinə həsr edilmiş mətbuat konfransında bildirib.
Onun sözlərinə əsasən, şirkətin səhmdarları da nizamnamə kapitalını iki milyon manata kimi artırmağı planlaşdırır.
Müslimovun sözlərinə əsasən, hazırda şirkətin 110 müştərisi var. İlin sonuna kimi onların sayının 150 nəfərə kimi artırılması planlaşdırılır.
Qlobal maliyyə böhranının təsirinə gəldikdə isə Müslimov bildirib ki, Azərbaycan bazarında yaranan vəziyyət nəticəsində şirkətdə sövdələşmələrin 15 faiz azalması müşahidə edilir.
"Buna baxmayaraq, şirkət operativ lizinqin tətbiqi üzrə təkliflər hazırlayır, belə ki, hazırda ATA Lizinq maliyyə lizinqi və sub-lizinq xidmətləri göstərir", - deyə o qeyd edib.
İlin sonuna qədərki planlar haqqında danışan Müslimov bildirib ki, şirkət fəal işlərini təkcə Bakıda deyil, eyni zamanda ölkə regionlarında da təsisçisi ATA Bank-ın fillialları vasitəsilə həyata keçirməyi davam etdirmək niyyətindədir.
ATA Lizinq-in təsisçiləri ucuz və uzunmüddətli resursların cəlb edilməsi üçün beynəlxalq maliyyə institutları ilə əməkdaşlığın inkişaf məsələlərini müzakirə edir.
ATA Lizinq 2004-cü ilin iyul ayında təsis edilib. Şirkətin təsisçiləri ATA Holding ASC (64 faiz) və ATA Bankdır (36 faiz).