Azərbaycan, Bakı, 16 iyul / Trend , müxbir N.İsmayılova /
Azərbaycanda iyulun 1-də rəsmi olaraq 44125 nəfər işsiz qeydə alınıb ki, onların da 45,7 faizi qadındır, bu barədə çərşənbə günü Dövlət Statistika Komitəsindən bildirilib. Birinci yarımil ərzində işsizlərin sayı 0,1 faiz azalıb. Ölkədə bir vakant yerə dörd nəfər iddia edir.
Hesabat dövründə işləyən əhalinin sayı 4064,4 min nəfər təşkil edib. 1383,7 min nəfər muzdla işləyənlərdir.
İstehsalat sahələrində muzdla işləyənlərdən 12,4 faizi sənaye, 4,8 faizi tikinti, 2,7 faizi kənd, meşə təsərrüfatında, balıqçılıq sahələrində çalışır.
Xidmətlər sahəsində çalışanların 25,5 faizi təhsil, 19,5 faizi topdan və pərakəndə satış, avtomobil, məişət avadanlıqları təmiri sahələrində, 10,1 faizi səhiyyə və sosial xidmətlər sahəsində, 5 faizi nəqliyyat, rabitə, 6,2 faizi kommunal, sosial sahə xə xüsusi xidmət sahələrində, beş faizi mülk əməliyyatları, icarə, 4,2 faizi dövlət idarəetmə və müdafiə sahələrində, 2,7 faizi isə digər sahələrdə fəaliyyət göstərir.
Yanvar-may aylarında (bu göstəricilər üzrə statistika bir ay gecikib) iqtisadi fəaliyyət ilə məşğul olan əcnəbilərin sayı beş min nəfər təşkil edib ki, onların da 1,5 min nəfəri tikinti, 0,6 min nəfəri mülk əməliyyatları, 0,5 min nəfəri ticarət, 0,4 min nəfəri təhsil, 0,6 min nəfəri isə digər sahələrdə fəaliyyət göstərir.
İşsizlik üzrə yardımın orta məbləği 157,8 manat təşkil edir.
İyulun 15-nə olan rəsmi məzənnə 0,8043 AZN/USD təşkil edir.
Məqalə müəllifi ilə əlaqə ünvanı: [email protected]