Azərbaycan, Bakı, 21 iyul / Trend , müxbir Ü.İsmayılova /
Azərbaycan Beynəlxalq Bankı (ABB) dünya maliyyə böhranının təsiri ilə verilmiş kreditlərin qaytarılmasında müəyyən problemlər hiss edib. Bu barədə bankın İdarə Heyətinin sədri Cahangir Hacıyev məlumat verib.
"Bizim işimiz biznesin maliyyələşdirilməsindən ibarətdir, biznesmenlərin problemləri isə kreditlərin qaytarılmasına təsir edir", - Hacıyev deyib.
Onun sözlərinə görə, bu, bütün ölkələrdə və bütün banklarda müşahidə olunan təbii prosesdir və bu halda ABB bu məsələni ikitərəfli səviyyədə həll edir.
Hacıyev həmçinin deyib ki, Azərbycan iqtisadiyyatı, xüsusən də bank sektoru dünya maliyyə böhranının təsirindən kənarda qalmayıb. Lakin iqtisadiyyatın möhkəm vəziyyətinə görə proses minimal təsir göstərib.
Azərbaycan Mərkəzi Bankının uçot dərəcəsinin aşağı salınmasının mümkünlüyündən danışarkən ABB-nin İdarə Heyətinin sədri deyib ki, verilən kreditlərin faiz dərəcəsi yalnız Mərkəzi Bankın uçot dərəcəsindən deyil, həm də ehtiyatların qiymətləndirilməsindən və təklif olunmuş layihələrdən də asılıdır. Hansısa dərəcədən asılılıqda enmə və ya artma ola bilər.
ABB 1992-ci ildə Xarici İqtisadi Bankın Azərbaycan varisi kimi yaradılıb. ABB ölkənin bank sektorunda hakim mövqe tutur, inkişaf etmiş filial şəbəkəsinə malikdir.
ABB hələ də dövlət iştirakı ilə vahid bank olaraq qalır. Bankda dövlətin hissəsi 50,2 faiz təşkil edir. Kapitalın qalan hissəsi isə özəl səhmdarların vəsaiti hesabına formalaşdırılır.
ABB birinci rübü aktivindəki 3 308,8 milyon manatla başa vurub ki, bu da 2008-ci ilin analoji dövrü ilə müqayisədə 14,5 faiz çoxdur. ABB-nin müştərək kapitalı 391,2 milyon manat səviyyəsində müəyyənləşdirilib. Bunun 193,8 milyon manatı nizamnamə kapitalının payına düşür.
Aprelin 1-nə olan vəziyyətə görə, ABB-nin 37 filialı (il ərzində bir filial açılıb) var. Bu gün bank 592 bankomata (14 ədəd artıb) və 2 664 POS-terminala (keçən ilin birinci rübündə 2 397 olub) malikdir.
İyulun 21-nə olan rəsmi məzənnə 0,8041 AZN/USD təşkil edir.
Məqalə müəllifi ilə əlaqə ünvanı: [email protected]