Azərbaycan, Bakı, 17 avqust / Trend , müxbir Ü.İsmayılova /
Azərbaycanda yanvar-iyul aylarında sənaye istehsalının həcmi (məhsul istehsal edilib və sənaye xarakterli xidmət göstərilib) 11,3 milyard manat təşkil edib. Bu, ötən ilin analoji göstəricisindən 0,1 faiz çoxdur. Bu barədə bazar ertəsi Azərbaycan Dövlət Statsitika Komitəsindən məlumat verilib.
Hesabat dövrü ərzində hasilat sənayesi istehsalının həcmi 1,6 faiz artaraq ümumi sənaye istehsalının 72,5 faizlik xüsusi çəkisi ilə 8,205 milyard manat təşkil edir. Emal sənayesində artım tempi 8 faiz azalaraq 2,39 milyard manat (21,2 faiz) təşkil edir. Elektrik energetikası, qaz və su sahələrinə il ərzində 4,9 faizlik azalma ilə 710,2 milyon manat düşür (6,3 faiz).
Neftçıxarmada istehsalın artımı 1,6 faiz, qazçıxarmada 1,6 faiz təşkil edib. Neft emalında isə istehsal həcmi 10,3 faiz azalıb.
Qeyri-dövlət sektorunun payı yanvar-iyulda ümumi sənaye istehsalının 78,3 faizini təşkil edib (8,86 milyard manat).
Avqustun 17-nə olan cari məzənnə 0,804 AZN/USD təşkil edir.
Məqalə müəllifi ilə əlaqə ünvanı: [email protected]
