Azərbaycan, Bakı, 18 avqust / Trend , müxbir İ.Xəlilova /
CARES (Mərkəzi Asiya regional iqtisadi əməkdaşlıq) proqramının ekspertinin Azərbaycan hökuməti ilə ötən həftə Bakıda keçirilən məsləhətləşmələri ölkədə nəqliyyat və ticarət prosedurunu tənzimləyəcək ayrıca dövlət orqanının yaradılması ilə bağlı məsələyə müəyyənlik gətirməyib. Bu barədə bazar ertəsi Asiya İnkişaf Bankının Bakı nümayəndəliyindən deyilib.
"Konkret qərar hələ əldə olunmayıb və ola bilər ki, bu məsələ TRASEKA proqramı ilə olduğu kimi tənzimlənsin, çox güman hansısa dövlət təsisatının tərkibində şöbə yaradılacaq, - nümayəndəlikdən deyilib. - Hələlik məsləhətçi işgüzar müzakirələr keçirib və ola bilər ki, bu müzakirələr davam etdirilsin, yaxud sözügedən prosesin gələcək inkişafı olmasın".
Üç gün müddətində məsləhətçi Nəqliyyat, İqtisadi İnkişaf nazirlikləri və Dövlət Gömrük Komitəsi ilə bu cür strukturun yaradılması imkanları və onun statusunun müəyyənləşdirilməsi məqsədilə məsləhətləşmələr aparıb.
Bu orqanın yaradılması CARES proqramında nəqliyyat və ticarət prosedurunu sadələşdirmək məqsədilə nəzərdə tutulub. CARES artıq bir neçə ölkədə bu cür təsisat yaradıb.
"Hər ölkədə nəqliyyat və ticarət məsələlərini tənzimləyən daxili strukturu var. Buna görə də bu sahələrlə bağlı bütün prosedurların, o cümlədən də gömrük və digər yardımçı prosedurların bir orqanda birlşməsi çətindir", - nümayəndəlikdən deyilib.
Bu, məsləhətçinin Bakıya ikinci səfəridir. Sözügedən məsələ üzrə ilk müzakirələr apreldə aparılıb.
CARES altı iştirakçı ölkənin (Əfqanıstan, Azərbaycan, ÇXR, Qazaxıstan, Qırğızstan, Monqolustan, Tacikistan və Özbəkistan) və altı beynəlxalq təşkilatın (AİB, AYİB, BVF, İİB, BMT İnkişaf Proqramı və Dünya Bankı) əməkdaşlığıdır.
Məqalə müəllifi ilə əlaqə ünvanı: [email protected]
