Azərbaycan, Bakı, 26 avqust / Trend , müxbir Ü.İsmayılova /
Standardlaşdırma üzrə Beynəlxalq Təşkilatın (İSO) Cənubi Qafqaz regionunda ilk seminarı Bakıda keçiriləcək. Bu barədə çərşənbə günü Azərbaycanın Standardlaşdırma, Metrologiya və Patent üzrə Dövlət Komitəsindən məlumat verilib.
İSO katibliyi ilə Standartlaşdırma, Metrologiya və Patent üzrə Dövlət Komitəsinin birgə təşkil etdiyi seminar cari ilin 21-23 oktyabrında keçiriləcək.
Seminarın işində Azərbaycanla yanaşı, İSO təşkilatına üzv olan 10 ölkə iştirak edəcək. Seminarın məqsədi standartlaşdırma üzrə milli orqanların nümayəndələrinə İSO-nun informasiya təhlükəsizliyi sahəsindəki imkanlarını öyrətməkdir.
İSO tapşırığını bu şəkildə müəyyən edir: mal və xidmətlərin beynəlxalq mübadiləsini təmin etmək məqsədilə dünyada standardlaşdırma və əlaqədar fəaliyyət növlərinin inkişafına, eləcə də intellektual, elmi-texniki və iqtisadi sahələrdə əməkdaşlığın inkişafına kömək.
Bu gün İSO-nun tərkibinə 161 ölkənin standardlaşdırma üzrə milli təşkilatı daxildir.
Məqalə müəllifi ilə əlaqə ünvanı: [email protected]
