Azərbaycan, Bakı, 03 sentyabr / Trend , müxbir Ü.İsmayılova /
Azərbaycanın iri sığorta şirkətlərindən biri A-Group yeni tibbi sığorta proqramı VIP-ni hazırlayır. Bu barədə cümə axşamı şikrətin İdarə Heyətinin sədri Anar Bayramov deyib.
"Yeni proqram adi proqramlardan fərqli olaraq, demək olar ki, tibbi sığorta proqramlarında əksər hallarda nəzərdə tutulan bütün istisnaları əhatə edəcək", - Bayramov deyib.
Onun sözlərinə görə, yeni proqrama tibbi sığorta üzrə bütün xidmətlər, o cümlədən ankoloji və digər ağır xəstəliklərin müalicəsi, eləcə də dərmanların evə çatdırılması, ev həkimi xidmətləri və s. daxil ediləcək. Buna görə də VIP proqramının dəyəri adi proqramlardan baha olacaq.
"Tibbi sığortanın VIP proqramı həmçinin "donuz qripi"nə yoluxma halında sığorta təminatını nəzərdə tutur", - Bayramov deyib.
A-Group sığorta şirkəti 3 məcburi və 14 könüllü sığorta növü üzrə xidmət göstərir. Şirkətin nizamnamə kapitalı 1,55 milyon manatdır.
A-Group-un topladığı sığorta məbləğinin ümumi miqdarı ilin birinci yarısında 4,73 milyon manat təşkil edib. Bu da 2008-ci ilin nəticələrini 43 faizdən çox üstələyir. İlin birinci yarısı ərzində sığorta mükafatlarının əsas hissəsi könüllü tibbi sığortanın payına düşür - 4,497 milyon manat. 2008-ci ilin analoji dövrü ilə müqayisədə bu növdə sığorta mükafatlarının artımı 66 faiz təşkil edib. İlin birinci yarısında A-Group 1,94 milyon manat məbləğində ödəmələr edib.
Azərbaycanda iyulun 30-da ilk dəfə "donuz qripi"nə iki yoluxma halı qeydə alınıb. Xəstələr Fransadan (27 iyul) və Böyük Britaniyadan (29 iyul) qayıdan Bakı və Gəncə sakinləri olublar. Hər iki xəstə artıq sağalıb.
Sentybarın 03-nə olan rəsmi məzənnə 0,804 AZN/USD təşkil edir.
Məqalə müəllifi ilə əlaqə ünvanı: [email protected]